kitty-bingbing

悲涼

2008-01-21T03:13:00.001+08:00

悲涼正是本人依家個景況。
上文提到，有一個女高層婆娘殺到，攪到公司翻天覆地、天崩地裂，補充一句婆娘只係marketing o既高層，根本管唔到其他部門，只可惜毒婦神功了得，喜歡誇部門勁攪，茶水部、會計部、接待員等等等等無一幸免，全中流彈。

現況：敝部門由７個人，變做5個，依家得番3個。
我老細因為俾婆娘攪到吊頸都唔掂，結果辭埋職。但辭職原來唔係大晒，婆娘要佢繼續返工，坐多唔知幾個月，誓要玩到佢氣絕身亡，請到人頂佢個位先俾佢走，可惜上星期有人o黎見工，婆娘一句話人唔靚仔就唔請，相信呢一世佢都唔會請到人。而老細o既頭馬亦走得快好世界，不過要走都唔係咁易，o係last day o個日，婆娘下聖旨要同事唔知做多n咁多日先俾佢走，一係賠錢，最後賠錢了事。

而我，每日o既工作就係對付呢個弱智加精神病o既毒婦，所有事簡單複雜化驚你唔死，講o下我o既工作如下：
婆娘向我老細落聖旨，要做A。我就要即時聯絡各方面人馬，相關至少10個人、5個部門，之後婆娘就seafood癢問做咩做A唔到B，咁我就打俾A咁多個人推晒去，再聯絡B。如是者婆娘起碼改到G先收手，即是話我已經打o左n咁多個電話，處理o左n咁多樣事情，未計d人炸我形，話我攪亂檔
老點，其實唔關我事。當最後完成晒G，毒婦又會一句唔鐘意而唔俾錢人，之後個個找我悔氣。

我o既工作就係處理所有所有改唔完o既事情，一日未見整成品，都唔會知結果。

要知道，敝公司唔係蚊形公司，係上市公司，我每個月亦唔知點解要幫公司出住錢去完成任務，４個月後先出番俾我，大大話話一個月我出3-4千，依家已經有成萬幾蚊o係公司到。

鬼公司加鬼上司，睇o黎新年後我都要另謀高就喇！

乜o黎o架？

2008-01-19T04:32:00.000+08:00

成日話要織兩張冷墊俾兩小鬼，一直得個講事無時間完成，
終於上星期襯婆娘唔o係公司，老細又辭o左職不問世事，
我用office hour完成o左吉蒂張墊墊，而炳哥張紫色墊墊就要等一等喇，
呢種冷好得意、又好舒服，吉蒂一見到即時訓上去狂R，
依家墊墊放o係床尾，吉蒂每日都同我地訓o架！Yeah~~

一床兩人四貓

2008-01-17T04:40:00.000+08:00

話說本人張床都幾大，但未去到叮噹百寶袋咁大，
之不過天氣凍，每晚都會上演一幕歡樂滿東華亡命表演，
一張床兩張被兩個人四隻貓，
以上由炳哥示範何來多o左兩隻貓！

還是覺得你最好

2007-12-30T05:55:00.000+08:00

已經好耐好耐無用過我家大爺影相喇，
因為我發覺我同阿大爺仲有一大段距離。

簡單D講，我用大爺影o既相係capture唔到大帝們o個一刻o既心情同狀態，
出到o黎只係一幅又一幅質數好o既「硬照」。
即係白雪雪對眼圓碌碌D毛又一絲絲好「靚」o既Kitty，
同埋肥騰騰面圓圓又好「精靈」o既炳哥，
咁又有乜意思呢？

反之而，我用私伙細爺，影出o黎o既大帝正正反映到佢地當時o既情況，
一眼望落去已經感覺到佢地o既性格同特質，

歸根究底，因為我有大爺恐懼症，o係一個我控制唔到佢o既情況下，
俾佢控制番我，而細爺就o岩o岩相反。

即是話，機用人同人用機o既分別。

細爺下的吉蒂：冷靜、獨立、同埋成熟一D，係一隻有思想有頭腦o既聰明喵。

細爺下的炳哥：懶、無腦、隨便、鍾於享樂，完全係佢個性格。

GOODBYE!AMAZING PHOTOGRAPHER

2007-12-29T03:09:00.000+08:00

你未必會認識他，但你一定欣賞過他的作品，
可惜世事無常..........
今日，他走了..........
他是煩人先生的好朋友..........
BRILLIANT PHOTOGRAPHER﹣JC

請大家到這裡再一次欣賞他的才華吧！
JC's Fantastic Photography World
Date Duration: 18/12/07- 04/01/08
Time: 11am-8pm
Address: 2/F, Pacific House, 20 Queens Road,Central.
(Opposite to Landmark,In Between JOYCE & Marks & Spencers)
Fees: Free

出地獄記

2007-12-20T01:27:00.000+08:00

如果官恩娜係地獄第18層廚神，我相信我都係第6層，
我又未至於會燒到個爐著火、鹽當糖落咁恐怖，
但係永遠整出o黎都係所有味分開，食物o既味同調味料o既味完全唔夾，
無天份就係無天份................
之不過長期出街食恐怕有日會食味精而死，
所以，太頂唔順o既時候都會o係屋企求其整o下o野食。

某日，我同煩人先生講落街買o野返o黎煮，
都係蒸水蛋、蒸肉餅呢D食唔死人o既簡單o野，
佢一聽到面色由白轉青再轉灰.....
查實佢係天才小廚神煮o野好好食o既，
不過佢太多o野做我費事叫佢煮，
最後兩條友都係落o左超市睇睇有咩簡單又唔會難食o既o野可以整。

正當我手扲一包叉燒、一包菜，煩人先生突然從後殺出話：不如打邊爐。
就係咁佢由地獄門口拉自己上番人間，
都好o既.....打邊爐一鑊熟唔洗煩！

o個D菇菇、菜菜係惠康一大盒Pack好晒專For打邊爐用，乾手淨腳快靚正。

仲有墨魚滑、雲吞、豆腐等等都係來自惠康，好方便。

吉蒂姐繼續訓佢o既覺，攪到成身小肥羊味。

吉蒂：你地攪咩呀？食罐頭咪得o羅，請罐你食又點話吖！

小肥羊湯包，好味X100...........呵∼呵∼呵∼

投訴

2007-12-11T03:30:00.000+08:00

惡炳：HI....EVERYBODY....我都成日叫條粉皮UPDATE我D靚仔相o架啦，佢唔聽不特止呀，仲成日唔o係屋企，依家...家不成家亂過狗竇，我係貓並唔係狗！

惡炳：粉絲們，我有無靚仔到呢？嘻∼嘻∼有人話我肥o左又白o左喎！

基於我公司年尾流流勁炒人...
基於我個部們得番4個人.....
基於o黎o左一個九唔搭八o既惡毒女高層......
基於真係好差勁多o野要做......
所以我消失o左........
不過.....依家咪蒲番頭o羅！呵∼呵∼

常伴我左右

2007-12-07T03:45:00.000+08:00

一個好美味又好豐富o既麥噹噹早晨全餐，對我o黎講見到佢慘過行刑。

先介紹呢張相o既背境：
日期：一個月入面o既好多日
時間：朝早８點幾
地點：我屋企

朝早放工買埋麥噹噹返屋企食，再訓一陣再死起身返工，呢個就係我呢排o既生活！

阿姐，你咪玩o野！

2007-12-01T04:04:00.000+08:00

繼阿kitty小姐左面頸開刀又一新巨獻，
阿姐突然爛右面頸，出濃又出水o個隻，
短短兩三日突然變成咁.......又要探瑪姬醫生。
醫生同姑娘姐姐一見到，忍唔住嘩o左一大聲，
我堅持食物敏感，瑪姬話係生癬，不過照燈無發現。
食抗敏感藥、用癬膏，結果10日後公佈。
..
..
..
..
..
..
10日後，
結果公佈.....真係生癬呀.......返去瑪姬到扲藥呀！
之不過，今次生癬事件啟發o左我一樣o野，
原來炳哥同kitty姐真係世仇，因為惡炳無被傳染。
諗諗o下，kitty姐每日襯我地出門口，都會用頸快速high我地對鞋，
又諗諗o下，知道阿姐生癬後，原來我無做過任何清潔，只係放藥落佢d罐頭到，
再諗諗o下，我真係衰得緊要呀！
不過，阿姐好番啦！

終極無聊之台北一天遊

2007-09-14T03:33:00.000+08:00

估唔到我今年第一次遠行就攪成咁........唉..........
因工事要去台灣一轉，可惜時間極趕，一晚都無得留低，又係即影即出o個d死o野...無聊透頂！

朝早05:15，同事坐的士pack up我去中環機鐵站，可惜第一班車都要06:00鐘開，惟有再打的入機場。

去到機場不過係06:05，約o左其他同事06:30....兩個無訓過o既人，就死咁企o係到，唔知做乜。

晨咁早o既機場，原來好多人，好似旺角一樣。

終於等齊人，紅衫係我老細，其餘係同事。我同男同事都係通頂出發，睇o下幾時死。

我影相佢地Check in，死口死面。

空空如也o既輸送帶，當然啦....我地驚唔見行李，全部手扲上機。

08:15機，仲有時間去美心飲個早茶，4個人埋單3百幾。

上機喇上機喇....唔知係咪飛機細，只有15分鐘登機，我地又俾空姐小姐追殺。byebye香港...幾個鐘。

到步10:30，拿拿聲Call車接我地，呢架Benz就係我地坐o既車。

沿途個個訓死一樣，全程一粒聲都無出過。

去到我地o既目的地酒泉街，因為01:00就要開始工作，快快手搵o野食。

真係好攪笑，4個就死o既人用o左45分鐘打邊爐，都話無聊o架啦！

再返去目的地，由窗門睇o下出面o既風景，我地要做到05:30先走得o架！唉..........

十級騎呢，大家留意o下紅圈入面係乜？無錯係細路仔玩o既車仔，呢間竟然係幼稚園，o係香港我唔信有人讀o羅！

準時離開，佢地死都話要去西門町買書，o個到無寵物店o架o麻，好傷心！惟有去食鴨.....

再去食冰，但感覺好似食緊魚檔o既冰，ok啦..........食完拿拿聲仆去機場！

唉......09:00鐘機.....我地又到o左機場喇！

同樣得15分鐘登機，又俾空姐小姐四圍搵我地......byebye喇台灣！我成日話唔得閒，咪做埋呢d無謂o野o羅，第二日又要晨咁早返工，人都癲。

工作態度

2007-08-29T05:20:00.001+08:00

我發覺打工絕對唔需要勤力，
可以日日無所事事扮忙，
check email加msn再小事化大就可以令全世界覺得好忙，
求教.....有無方法可以做呢種人呢？
因為扮忙，絕對難過落手落腳勁做1000000倍！
有無人可以教我？

新形象

2007-08-26T07:21:00.000+08:00

用o左一個通宵幫呢個Kitty-bingbing Blog改頭換面，你地鍾意嗎？
o係搵相o既時候摷到呢兩張Kitty仔得意相，眼仔碌碌非常Cutie^^

交剪腳

2007-08-24T07:47:00.000+08:00

非常之唔明呢個臭炳諗乜，除o左為貓騎呢之外仲非常無聊，成日借d倚攪o下人又攪o下貓，真係好好玩咩？
o拿，又唔知做乜走去交剪腳夾人條尾，想點呢？？

狗之零食

2007-08-22T19:28:00.000+08:00

如果唔係我，我相信大佬呢世都無零食落口，真係慘！順手買包貓草俾佢地過癮o下，好好玩！

一切安好

2007-08-18T06:14:00.000+08:00

瑪姬講得無錯，Kitty貓真係好抵o鍚。
訓o左一晚，第二朝已經回復正常，佢外表同性格相反，比大家相像中更堅強，同平時一樣無咩分別，唔似個衰仔炳返到屋企就發晒脾氣，狂叫仲搵我出氣。
醫生已經割o左佢頸上兩粒肉瘤，照形狀同範圍睇就無咩事，如果我想進一步証實，就要Send去外國做化驗。而衰仔炳o既X-ray，亦見唔到心臟發大一切正常，外面無事就要知入面心肌有無問題，呢個要照超聲波先知，半年後再去檢查。
吉蒂貓：做乜影我？？做乜影到我咁樣衰呀？？？？？？

喉嚨上o既兩個傷口，瑪姬o既手勢好好，吉蒂唔係用溶線，10日後要返去拆線，但醫生用透明線縫得好靚，傷口乾淨無血痕無線口，小吉蒂亦同平時一樣四圍跳，行行企企訓o下覺，食o下o野清潔o下patpat，依舊咁敏捷，傷口應該唔痛掛，唔知道佢知唔知自己做過手術呢？
今年3歲o既吉蒂已經有3次全身麻醉記錄，第１次絕育、第２次洗耳兼洗耳、第３次就係今次，真係求神拜佛，千祈千祈唔好再咁樣喇，我同炳哥一樣，都係唔嚇得o架！
今次特別要多謝瑪姬醫生同大家o既關心，小吉蒂一切安好！

手術了.....

2007-08-17T05:39:00.000+08:00

我的天呀....放工返到屋企已經係晨早6點幾，沖個涼執o下o野就同佢地影相，因為我知吉蒂小姐要剷毛，所以想幫佢影多D靚女相，話晒佢由細到大都係毛神神，剷o左忽毛肯定有排留。

吉蒂小姐永遠都咁氣定神閒，仲坐定定俾我影相。

傻仔炳唔知發生咩事，點解我會幫佢影相呢？

要出門口喇，一個人兩隻貓打的去中環診所。

我要簽兩張紙，就係咁張兩條貓命交俾瑪姬醫生。（吉蒂貓望緊正在反肚撩我玩o既肥貓花花，炳仔就不停沉思同狂叫。）

行過香港站，見到又有吉蒂，影張相先！

心緒不寧又非常擔心，諗起我未送生日禮物俾佢地，就走o左去買毛毛俾佢地玩。有好貴o既king size駝鳥毛。

3條好靚o既孔雀毛。

粉藍色長毛毛。

粉紅色長毛毛。

之後再落銅鑼灣KIEHL'S放低＄１０００大元，食埋o野就返屋企消毒等佢地返o黎。

由於太眼訓，攪攪o下遲o左出門口接佢地，又要打的出中環。姑娘一見我就話炳仔好乖仔，唔洗麻醉、唔洗鎮靜就可以照X-ray，同埋話吉蒂貓仲抵o鍚，話佢全程非常乖，冷靜又鎮定，唔驚唔叫又唔怕陌生，之後等o左一陣我就去見醫生，埋單非常抵，Total$1880。（不過抵還抵，呢D錢唔洗好過洗，每年打年針見一次醫生好喇，千祈唔好再大大鑊。）

返到屋企，真係估佢唔到，雖則瑪姬落麻醉藥一向好準確，次次吉蒂貓都好精神，但係今次話晒係兩個傷口，估唔到呢個吉蒂仲係眼碌碌，不停食o野，只係毛毛亂o左D，同埋有少少攰。

唔知點解，次次吉蒂全身麻醉完都係眼光光，唔係好訓覺。佢好似唔係好知自己做o左手術，都係同平時一樣，安樂晒。

平安

2007-08-16T21:17:00.000+08:00

聽日我就要帶兩小貓見瑪姬醫生喇，
我最愛o既小吉蒂要做手術，割走頸上兩粒肉瘤，
小炳就要照X-ray，睇清楚心臟有無發大，
不過，我已經連續一個星期收凌晨，今晚仲無4點都唔走得!
點解我要Book聽日?因為我忙完只有幾日得閒又再繼續做到死，
所以，我寧願自己唔訓去帶佢地見o左醫生先，
起碼我可以放2日假照顧佢地.....
好擔心...真係好擔心.....
不過將佢地交俾瑪姬醫生已經係最放心，
係我決定要吉莃開刀割肉瘤..希望佢唔好嬲我啦..

jenny's hand made cookies

2007-08-09T05:34:00.000+08:00

為o左回贈煩人先生所送o既禮物，我去o左銅鑼灣買o左呢盒手製Cookies俾佢，果然名不虛傳好鬆化又好香好好味，想買o既朋友就去銅鑼坊啦！

我的生日禮物

2007-08-08T05:26:00.000+08:00

今年我收到3份生日禮物，量唔多但質非常好。多謝送禮物俾我o既人，而未送o既就快d蒲頭，唔該。

繼有煩人先生送o既NDS，再有我兩個阿姨送o既LV銀包，o岩心水！

仲有我前面位好同事送o既Hello Kitty燈，呢位碩士同事人品好、做事更好，絕對唔適合出現o係呢間鬼公司，所以佢已經離o左職喇！

HAPPY BIRTHDAY TO ME..........

2007-08-07T04:57:00.000+08:00

又生日又老多一年，諗起上年生日本人在牙痛中渡過，無啦啦又過o左一年，
乜都無做過，只係呆o下呆o下，過o左365日，
今年生日願望：
祝全世界o既生物都身體健康、心想事成、笑口常開，同埋本人可以快D轉工！
煩人買o左個芝士芒果生日蛋糕俾我，老實講好難食。（購自伊騰家）
同煩人先生去o左潮樓食飯，叫o左炒花枝片一碟。
蠔仔粥一碗。
炒菜一碟。
炒雞、同「魯」水併盆，兩個人勁食。
甜品有haggen dazs雪糕，好好味！因為佢之前已經送o左NDS俾我，是日無禮物收。

因病得福

2007-08-05T01:20:00.000+08:00

唔知點解突然會食物敏感，成身生到一舊二舊，無計要請病假睇醫生。亦因為咁我見到SOGO有大減價，買o左我最愛o既Charmmykitty、頭飾送俾身在日本o既朋友、同埋字典同心心毛巾，雖然腫到變豬頭，但都好開心！變態^^

愛上沙拉

2007-08-04T02:19:00.000+08:00

天氣太熱，超級無胃口，所以愛上o左老麥o既沙拉，唔知點解成日都心思思想食番盒，一直都無食過佢地o既沙拉，估唔到一食就唔停得口，可能天氣真係太熱！

HAPPY BIRTHDAY TO KITTY CATCAT

2007-08-03T23:36:00.000+08:00

HAPPY BIRTHDAY TO YOU~~HAPPY BIRTHDAY TO YOU~~HAPPY BIRTHDAY TO KITTY~~HAPPY BIRTHDAY TO YOU~~
8月3號就係吉蒂妹3歲生日，今年無買禮物亦都無大肆慶祝，只係有兩舊蛋糕同埋開罐頭，唔經唔覺吉蒂妹同我生活o左2年幾，佢個樣依然咁靚、性格依舊咁乖、同樣炳哥依然咁裙腳仔，我最希望可以同佢地開多20次生日會。嘻∼嘻∼即係佢地有20幾歲命！^^

o係我開罐罐俾佢地時，個吉蒂心急地跳上洗手盆，又唔小心地爪跌個玻璃杯，成個杯緊貼佢身邊爆開，不過悍婦吉蒂一d都唔驚，仲企o係側面睇o野，個炳仔晨早嚇到匿埋o左喇，無膽鬼！

動漫節

2007-08-01T23:52:00.000+08:00

突然接到個癲爆女高層Order，話要即刻去動漫節進行特別任務，呢個女高層最興把口快過個腦，做埋D o野無Scence又無聊，但鬼叫佢係女高層，叫我去死都要o架啦！
做o野事小、買o野事大，即時買o左個Fing頭招貴貓，幫我招多d財，仲有甜甜私房貓，可惜第3冊賣晒，同埋貓貓File，嘻∼嘻∼好靚！好彩我識苦中作樂，開心o下！

買啦買啦

2007-07-28T01:04:00.000+08:00

非常之感謝我老細，因為佢叫我幫佢去北角扲o野，亦因為咁樣我路經新都城百貨，見到Trendy Land開倉，好耐都無買過o野喇，好o野又可以Shopping！

機霸Kitty

2007-07-27T00:58:00.000+08:00

近來Kitty貓成日霸住我部NDS，唔係打機......係墊手同訓覺，唔知點解係喵都鍾意墊住D o野，好舒服咩？

遊旺角

2007-07-25T00:18:00.000+08:00

今日做o野路經旺角，一個好耐都無去o既地方。原本炳仔可以3年先打一次年針，所以我都係求其俾個袋佢用，費事o徒錢o麻。但以後佢要Keep住檢查，所以都係買個靚靚袋俾佢！
揀o左好耐，睇中呢個靚靚粉紅，不過個過程好激氣，除o左個cheap老闆不停大聲重覆同我講個袋幾錢（o個2百幾蚊驚死我無錢買咩><），到我買時佢仲死都唔肯俾個新我（明明另一個女sales講o左幾次有貨），算數，鬼叫我10世唔出一次旺角，好女不與男鬥。

仲買o左個小丑圈圈俾個肥仔炳，等佢下個月生日影靚相。
同埋，我最鍾意o既CharmmyKitty，其中一個袋用o黎袋NDS！

體操隊

2007-07-23T03:35:00.000+08:00

Kitty貓雖然毛神神腳短短，但身手超級敏捷（可能俾炳仔追殺得多），
每一日佢會o係屋企玩體操，仲係10項全能，
高低降、平衡木統統難佢唔到！

失雞無神恭喜你

2007-07-22T03:06:00.000+08:00

返到屋企見到呢大箱不知名物體，無乜反應以為煩人先生影相o既道具，
某日見到佢o係到拆箱..心知不妙..必定係放o係屋企o既.......

足足有6尺幾高o既紙皮箱究竟放乜？

又有一舊白色蛋形物體...Sorry...係恐龍蛋先o岩！

Kitty貓一直o係側邊監視，有乜風吹草動即時衝過去...............玩！

炳哥好白痴，又要驚又要睇，結果跳上枱搵Kitty貓壯膽！

睇o左好耐...偵探吉蒂都話未有發現！

原來.....係一支..........好很高o既.............燈........

仲有一支..............好似.........飛碟......唔係...係燈先o岩！

夜晚好有情調.....唔會太黑又唔會太光！

吉蒂偵探調查所得，呢兩支係o黎自「連揸佛」o既燈，究竟煩人先生係發o左達.....定係發o左癲呢？

不幸..........

2007-07-21T02:15:00.000+08:00

今日天氣依然晴朗.....但唔包括我o既心情！
預早安排好帶兩小貓去探瑪姬醫生打年針，
照舊同煩人先生一人一隻浩浩蕩蕩出門口，
去到同醫生傾o左幾句就開始打針時間，
炳仔肥屎大隻當然要做先頭步隊，
呢個肥仔無病無痛頂多都係過重，
醫生用聽筒聽o下聽o下.....再講幾句影響炳仔一生o既說話，
瑪姬醫生話...炳哥心臟有雜聲，好多純種貓都會出現呢個問題，
將來可能會影響到心肌發大，不過呢個病都分幾期...暫時未去到呢d階段，
如果要進一步確定，就要照X-ray同埋其他檢查，依家要留意佢個體重，
怕太肥會影響心臟負荷...........
當時我個心死o左一半...............................................
輪到最乖o既Kitty貓，
耳仔乾淨o左好多...扲支耳藥水返去滴o下就無問題，
突然醒起，早個寧兩個月前摸到佢喉嚨位生o左粒o野順手叫醫生睇睇，
醫生一摸就摸到...仲笑笑口話晶片....
NO...當然唔係啦，因為佢從來無打過晶片...半歲大已經無轉過醫生，
瑪姬即時扲o黎一部機，想Scan o下佢粒「晶片」.......
醫生面色一沉...因為Scan唔到任何o野，
跟手再細心地摸摸摸，叫埋助手一齊摸，
問o左好多資料...無變大、無痛、無R、無甩毛....
驚人發現..原來係2粒唔係1粒...一大一小..........
好心急好驚...即時問會唔會係Cancer，
醫生見我面如死灰..快口用中文答我：「唔係Cancer」
再話唔係一定必要割...但割o左比較好啦..始於留o係身體內有太多變數..
仲話割完之後幫我扲去防腐，如果再生先send去美國化驗...
最後...叫我考慮o下炳仔照唔照X-ray...Kitty妹割唔割....

依家Book o左8月17號朝早帶晒2隻馬騮去照照割割.....
諗起Kitty妹o係喉嚨大動脈位開刀我就頭暈..
再諗起炳哥成日咬佢呢個位就更頭暈...
再再諗起手術後點分隔佢地更更頭暈....
但最頭暈都係.....好擔心...好擔心佢地o既健康問題...
依家我可以做o既都係順其自然同求神保佑同俾多d o野佢食等佢肥d做手術陪佢地玩多d等佢地唔好緊張啦！
我的天啊.......................!!

Friend番？

2007-07-20T23:30:00.000+08:00

大熱天時，每逄我o係屋企都會開大冷氣俾貓嘆，
屋企有張玻璃枱絕對係抖暑o係好地方，
為o左散熱兩貓不惜共處一枱，
不過吉蒂貓強調佢絕對唔係同炳仔friend番.....
要嘆冷氣點都要有少少犧牲啦！

懶人養貓法

2007-07-19T23:18:00.000+08:00

養阿為食炳真係好，
乜都食一餐唔洗迫唔係煩，
Kitty貓唔肯食吐毛膏次次都打仗一樣，
炳仔就方便得多放去嘴邊成支慢慢啜，
我連手都唔洗洗添。

消暑

2007-07-18T23:14:00.000+08:00

熱到爆炸完全唔想食o野，
去惠康買pack生果、去粥鋪買碗豆腐花，
撈埋食又一餐..........

新機到手

2007-07-17T02:18:00.000+08:00

不得了不得了.....明顯我中o左毒！
o係公司等版其間個個同事扲出NDS對打孖寶兄弟，
我望到眼甘甘流晒口水..佢地當然借俾我玩，
點知一玩就出事............................................
想當年我有個PS2三國無雙打到不眠不休工都唔想返o既教訓，
所以深明“機”係唔可以亂打呢個道理...可惜後悔已經太遲！
返屋企同煩人先生講...好想擁有一部NDS，
撞o岩本人下個月生日..就當生日禮物啦，
結果一日後部機已經出現o左o係屋企，
如果大家o係街見到有隻熊貓邊行邊打機，
千祈唔好驚......o個個係我o黎o架！

電話Shopping

2007-07-15T02:07:00.000+08:00

我都話呆o係公司係唔會阻止到我Shopping，
個人唔可以走出公司門口半步，
不過d用品可以行入o黎o架o麻！
每當夜晚過12點收工都可以打的返屋企，
就襯最忙o既日子打電話訂貨送去公司，
收工就坐的士返歸，Fit到震！
今次就打去買三文魚粒粒間Petshop，
問佢有乜新貨再落Order，
買o左Applaws罐罐、整腸啫喱小食同埋Iris試尿石貓沙，
收鑊都算唔錯。
老闆娘好好人，我睇番張單先知原來打o左折頭俾我，
罐罐只係$10、貓沙就$65，仲送埋貨好抵好抵！

喵喵年鑑

2007-07-14T01:49:00.000+08:00

又到一個月最最最忙o既日子，
成班好似坐監一樣呆o係公司，
不過，唔好以為咁樣就可以阻止我睇喵o野，
買o左本2007貓咪用品年鑑扲返公司慢慢煲，
本書都幾好睇..用品都算多，
美中不足就係要就廣告狂出某d牌子，
同埋，呢本係台灣書有好多o野香港都無得買！
又有一個新志願.....就係自己出番本港版貓咪用品年鑑！嘻∼嘻∼

扭蛋

2007-07-12T00:48:00.000+08:00

我最愛o既CharmmyKitty出扭蛋，身為粉絲o既我當然會捧場！而且呢一Set又真係幾靚o架，顔色靚手工一流！

種子

2007-07-07T00:40:00.000+08:00

基本上市面上o既吐毛膏我都買過俾吉蒂姐食，但阿姐唔賞面見到掉頭走，所以我要種貓草俾佢嘆。好攪笑佢見到草就發晒狂，成條成條生吞，相反炳哥就望都唔望一眼！
同種試新o野o既精神，我屋企係有３種唔同o既種子，雖則都係貓草，但種出o黎真係有少少唔同o架！

救命魚蛋河

2007-07-06T00:33:00.000+08:00

凌晨唔記得幾點，突然好肚餓，係超級肚餓o個隻，打俾煩人先生叫佢買o野食，最後我得到一碗翠華魚蛋河，快快手勁食.....結果兩啖就飽！但o係肚餓o既時候，食o既o野永遠都係最好味，同埋最快飽！

試糧篇24

2007-07-05T00:21:00.000+08:00

Applaws

重量: 70g

主要成份: 雞肉加芝士

產地: 泰國

特別功能: 天然糧, 雞肉來自食有機飼料的雞

價格: $11

指數：炳哥覺得淡口唔係好想食，但見到吉蒂有得食，驚死蝕底就快快食，結果兩貓都清兜！

真乾淨

2007-07-04T00:17:00.000+08:00

本住白老鼠精神一次過試晒呢3隻，結果發現3隻都好乾淨，但藍色防敏感最好用，乾淨、清爽、唔刺激，唔錯！

不要賴貓

2007-07-03T03:43:00.000+08:00

龐小姐出生o係一個5貓家庭，之不過佢阿媽即係我阿姨o係婆婆屋企坐月，同時賓賓姐姐又太唔掂要炒魷魚，而且佢老豆亦要去澳洲公幹半年，為方便照顧龐小姐就同阿媽搬去（女麻）（女麻）屋企住，而爺爺就搬過貓屋同貓住。但係唔洗擔心，一來兩個屋企只係一街之隔，二來爺爺（女麻）（女麻）亦非常鍚貓，基本上5貓佢地都有份湊大，所以問題不大。

入正題，近排龐小姐皮膚敏感，佢阿媽發現原來係轉o左洗衣液問題，一直用開瑞士寶寶亦相安無事，佢母親又Seafood癢唔知轉o左乜鬼牌子，我知道後即刻同阿姨講：好彩佢唔係同貓住，如果唔係D廢柴醫生一定賴貓毛敏感。

各位先生小姐，無論你有無養動物、有無生BB亦都請大家留意：其實人同動物一樣可以出現敏感症，如果出現呢D問題，請大家心胸廣闊D，留意o下身邊o既日常事物，無論食用任何細微o既轉變都可以係致敏源，咪好似一D盲毛醫生一樣諗都唔諗就茅頭直指向貓狗動物，任何一樣o野都可以引起敏感o架！好似吉蒂貓小時候，對吐毛膏、貓草都可以敏感，唔通我賴炳仔咩！

龐小姐o既日用食物：NUK奶樽奶嘴、明治奶粉、大王Goon尿片、瑞士寶寶沖涼潔膚洗衣系列，唔好再亂咁轉喇！

古靈精怪系列之龐小姐

2007-07-02T02:43:00.000+08:00

7月21號就6個月o既龐小姐，平日非常之搞笑。一日24小時，佢都可以有唔同裝扮、唔同表情甚至乎唔同樣，出現o係大家眼前！著乜衫由佢阿媽決定，但表情就係佢本人o既主意，全部自己話晒事。而且龐小姐極有好客之道，就算佢眼瞓到爆炸，只要有人同佢講，佢都會應酬式大笑幾聲先再發呆兼黑面，細細個已經好有禮貌o架喇！
唔知幾時，龐小姐學識呢個大眼B女一號表情，周不時佢都會Keep住咁o既樣睇電視。
突然又會轉樣轉Look，戴頂淑女花花帽坐o係屋企，唔係出街。
o岩o岩瞓醒就會怒髮衝冠，雞冠頭再扮得意，引你抱抱！
沖完涼就會變攣毛，一見佢個好知己小蜜蜂必定笑到卡卡聲，唔停得口！
坐o係餐椅等開餐，放滿大堆玩具任玩，呢個時候必定係頭髮零亂，好似打風一樣。
食飽無o野做，周圍搵o野狂咬，睇佢陶醉o既表情，簡直有炳仔風範。
拿...拿......拿........無啦啦個髮型又四四正正，夾個花花夾仔，個樣即時斯文又醒神。
平日百無了賴，全靠呢堆公仔陪o下過日晨，最好玩當然係橙色貓貓書啦！
登登登登，彩色花花裙，呢個係最靚女o既公主Look，不過佢唔會咁樣著出街o架，因為著裙成日走光，著褲方便好多！

7.1返歸

2007-07-01T02:16:00.000+08:00

７月１號返老家同阿公食飯，本人老家唔係窮鄉僻壤但位置確實騎呢，每一次我都要坐地鐵到葵芳再轉巴士，一係就去旺角再轉小巴，再唔係直接打的都得o既，所以每次我都好似去旅行一樣，不停轉車轉車再轉車！
今次我就揀o左去旺角朗豪坊坐小巴，都算快4-5個字就可以到達目的地！
由屋企落Sogo買o野俾我d屋企人先，一個人扲住大袋o野，ON居居坐車！超眼瞓..............
買o左大粒士多啤梨、藍莓同埋巨峰提子，加埋我阿公買o既車厘子同荔枝，十足十生果餐！
最緊要係買餅仔俾龐小姐，幾十蚊盒好貴！養人同養貓一樣，都係倒水玩意！
老家附近有間寵物店，聽聞d o野好平，專登早一個站落車，嘩......買o左100蚊4包o既三文魚粒粒，出面買好貴鬼o架！平時貓貓係粉紅色，狗仔係藍色，其實用料一樣只係包裝袋上寫o既食用量唔同！仲有好多o野想買o架，不過我一面睇一面有電話狂催我現身，可惜可惜！邊個想買就講聲，我下次返老家時大手入貨啦！因為間寵物店可以送貨o架！！

黑仔

2007-06-30T03:00:00.000+08:00

兩小貓經已過o左期都未打年針，
千辛萬苦左度右度預早兩個星期Book時間，
點不知全日傾盆大雨必定變成落湯貓，
迫於無奈惟有改時間。
之不過o黎緊係我每個月最最最忙o既日子，
只可以Book７月尾啦！
如果到時煩人先生唔得閒，
我就一人帶兩貓揹廿幾磅貓肉上身，
扲到甩骹就叫瑪姬醫生順手幫我睇睇o羅！

正粽

2007-06-29T03:22:00.000+08:00

我至愛o既Jenny婆婆廚藝了得，
大時大節必會有大堆應節食品，
端午節當然有最好味o既咸肉粽啦！
大大粒紅豆、大舊冬菇加乾瑤柱，
煩人先生就狂食我阿婆o既靚粽，
佢阿媽o個D依然o係冰箱o羅！

限期

2007-06-28T04:12:00.000+08:00

工作上四肢乏力很難再多走一步，
身心嚴重疲累魂不附體，
日子耐了慢慢發現大家的出色演技，
討厭做門面功夫o徒時間o徒精神，
但沉著實幹像新界牛又如何呢？
決心搵出路年底前誓要離開這鬼地獄，
各位演員俾心機演戲吧，
影帝影后非你們莫屬！挑！

傻瓜人

2007-06-27T02:13:00.001+08:00

明明部相機係我，點解好似唔識用咁o既？話明係傻瓜機，即係低低地都會識用啦，點解我平時會影得咁樣衰o既？
我終於明白，識用部相機緊要過擁有一部靚機，同一部機放o係唔同人手上，原來有咁大分別！唔知道，有無更傻瓜o既傻瓜機呢？

型仔炳

2007-06-26T01:40:00.000+08:00

雖然煩人先生偏心吉蒂姐，但o係佢個偷影相薄入面都有呢個豬頭炳份o架！平日個豬炳騎騎呢呢無o黎正經，估唔到都可以扮o下憂鬱小生呃女仔。如果大家身邊有靚女，即管介紹俾佢！！

偷影

2007-06-25T03:14:00.000+08:00

前文提過，唔知幾時煩人先生偷偷地幫兩貓影o左D相，經本人大肆搜查之下，結果有驚人發現，原來佢幫兩位大帝影o左好多相，仲要係撻我部傻瓜機去影。影相唔緊要，出聲先得o架，同埋唔該教埋我點影啦，激氣！

飄逸

2007-06-24T03:09:00.000+08:00

唔知幾時煩人先生幫吉蒂姐影o左呢d相，一睇之下非常鐘意！佢d毛毛好似俾大風吹完後，飛飛o下好飄逸，搞笑！

大家姐

2007-06-23T02:36:00.000+08:00

吉蒂姐雖然成日俾賤炳恰，但佢依然保持住大家姐風範！憑住佢大膽、外向、不屈不撓、面皮厚、唔向惡勢力低頭o既性格，贏盡我地o既歡心，特別係煩人先生更臣服佢之下，結果吉蒂姐成功穩坐大家姐地位。
每一晚，佢都會坐上佢個龍位瞓覺（即係我電腦前），千祈唔好睇小呢個位，並唔係人人都瞓得，如果賤炳走上去，必定會9秒9俾煩人趕落地，所以話吉蒂姐呢個名絕對唔係浪得虛名，真係有江湖地位！

吉蒂姐：影夠未？阿姐依家要瞓覺，咪阻住晒！

吉蒂姐：呢個位冬暖夏涼，最o岩做我o既龍床。

吉蒂姐：ZZZZZZZ.....ZZZZZ.ZZZ......ZZZZZZ.................

時差

2007-06-22T06:13:00.000+08:00

經過早前不眠不休之旅，依家終於可以稍稍正常番幾日。（正常o既意思係，唔洗6、7點瞓，可以3、4點瞓..........）
之不過從未離開過香港o既本人，竟然有時差，變態之極。返工時間依舊，但唔到7、8點根本瞓唔著。
再係咁落去，海洋公園將會多隻熊貓、青山會多個病人、或者公園多o左個耍太極o既阿毛。

一個下午．兩隻貓．兩個世界

2007-06-21T05:47:00.000+08:00

同一個下午，同一間屋，兩隻唔同性格o既喵！
有內涵o既吉蒂望天沉思，思考一o下貓生大道理。（黑面背境乃係電視機）

無性格o既肥炳，肉騰騰灘o係梳化，享受貓生一大樂事。

龍友

2007-06-20T05:31:00.000+08:00

一直都好討厭一個畫面，
扲部相機遮住塊面影一張唔知做乜o既相。
呢種相大家一定見過而且出鏡率奇高，
基本上，去任何一個攝影發燒友o既Blog都必定見到，
仲個個tune黑白用o黎做頭像。
有一個更爆笑o既現象，發燒友們仲登埋自己張靚仔相，
究竟代表D乜？影相等如好型？定還是好型所以影相？
又或是我影得自己好型所以影相，定係唔型就唔可以影相？
以上種種，不得而知，只知令人笑爆嘴！
我一班口衰兼抵死o既同事，每日就上呢D非常有型o既攝影大師Blog到笑餐死，
我地亦尊稱呢班有型之士為>>>>>>龍友!
咩叫做龍友？去南生圍睇o下咪知o羅！呵∼∼呵∼∼

搞笑的龐小姐

2007-06-18T19:39:00.000+08:00

5個幾月o既龐小姐過住貓一般o既優悠生活，
除o左食、瞓同埋玩最鐘意就係搞笑，
係又笑唔係又笑見到阿媽直頭狂笑，有咩咁好笑呢？

累了.....怒了.....

2007-06-17T19:08:00.000+08:00

自問工作上的EQ有99分，
同時我對工作亦甚少怨言，
並唔係工作環境理想..無壓力、無賤人，
相反賤精太多、壓力太勁、是非太厲害，
之不過，受人錢財替人消災，
份糧當然包括承受埋一切騎呢兼無理的事情，
接受就做唔接受就辭職吧.....無咩好怨！

不過本公司情況獨特，
長期唔夠人亦太難請人，
所以永遠都唔會炒人，
儲埋廢人一大堆達95%以上，
正因如此廢柴每日繼續廢，
做o既就每日不停做...直至氣絕身亡。

做到精神分裂都算了，
但一日只有24小時又可以做到幾多？
有限o既時間、無限o既工作、迫切o既deadline，
不眠不休返1300放2900再返1300，
兩小貓過晒期都未打針o既情況下，
終於我怒了.....對住老細發火
1)嚴重黑面 2)無敵爆粗 3)冷言冷語
雖則老細不停引我笑，
無補於事.....因為我真的發怒了！

大啖食

2007-06-15T20:09:00.000+08:00

龐小姐有個習慣，就係鐘意一大舊一大舊咁食，
之不過阿姐未出牙，係啜多過食！
據聞佢每日都要啜過蘋果先安樂，
仲追住啜扲走即時狂喊癲俾你睇。
不過佢全家實在太縱佢o既關係，
導致佢懶蟲精上身點都唔肯自己扲，
有性格值得加許！

飽晒

2007-06-14T20:23:00.000+08:00

由於天時暑熱，所以應煩人先生o既要求唔食飯食Pizza，
之不過...當我地見到o既時候當堂飽晒，
熱辣辣都係食雪糕最好，Pizza兩啖就算喇！

熱辣辣

2007-05-31T04:07:00.000+08:00

近排熱屎辣辣，炳哥最鐘意打出個大肚Dum任人睇，仲扮得意眼碌碌四圍望，黑人憎啊真係想食佢落肚！

夠了．．．收手吧

2007-05-30T03:31:00.000+08:00

近來好多貓友仔同我講，有團購喇何解我依然不為所動？有口難言，就算我點樣去解釋人家都好難想像到個情況。未計o係鴨家o既48罐罐頭，已經有無敵咁多濕糧、鍚紙包、小食，全部都係炳哥獨有，o黎緊兩年我都可以收手。更何況香港貓o野實在少得可憐，要買o既已經擁有，都無乜令我有購買慾喇。

新書

2007-05-29T19:38:00.000+08:00

行經三聯見到大減價，唔覺意又閃o左入去上倉，開卷有益吖o麻！

精神病乎？

2007-05-28T19:26:00.000+08:00

無可否認，本人o既購買慾已經去到瘋狂狀態，post出o黎只係少數，無影相上載就係大多數。唔好以為我無時間出街就無o野買，上網Shopping已經係我o既習慣，曾經試過門口接待員姐姐幫我收貨收到笑，見親面都識講：今日未有o野喎！睇o黎我真係要搵d o野轉移目標！

新款Marie化妝袋，又係唔用淨儲。

超得意o既Marie大湯碗，靚就靚但一定唔好用，收埋儲！

Marie同Charmmy Kitty近來無咩靚貨，惟有買隻兔兔頂住檔。

買o左個超大大袋袋，帶返工唔錯去打劫亦一流，因為夠晒大。

30歲前必做的事.....

2007-05-27T05:23:00.001+08:00

近來經常忽發其想，好想辭去工作感受一o下咩叫做生活，可能係我理想太多時間太少，總覺得每日營營疫疫返工放工再返工再放工，賺一舊只夠吊命o既生活費係非常無聊o既事，真正o既生活應該唔係咁樣。
上年無放過大假幾年無去過旅行，日日就真係做到無停手，吊頸都要抖o下氣掛。雖然我比好多人過得好，貓地o既生活亦都唔錯，叫做要乜有乜啦，但每一蚊都真係有血有汗，用好多心機去換番o黎，唔易賺。
我o既理想有好多，因為唔想成世人白過，點都要做D事滿足o下自己，唔想到死o個一日都諗唔起自己做過乜，浪費青春啊陰公。
好想30歲前完成以下呢D事，但機會都幾渺茫，因為本人離30不遠矣，加上有＄＄無時間，無＄＄就大把時間，惟有訓少D做得幾多得幾多啦！

１．幫吉蒂同炳哥出本寫真集，話晒人一世貓一世，點都要留個回憶。
２．學識我之前學緊o既o野。
３．開一間關於貓o既鋪頭，除o左識行識走o既真貓之外，其餘貓物品都可以搵得到。
４．要學識影相大法，做貓地o既御用攝影大師。
５．去外國流浪。
６．學識整蛋糕，o係屋企都要整到。
７．完成動物傳心術呢個課程。
８．出國讀一個短期課程。
９．學彈琴再學埋劃畫。
１０．開一間流浪動物收容所，等佢地食好住好著好。

做到一兩樣都要還神喇！唉.....

貓上身

2007-05-26T05:18:00.000+08:00

我每日都會帶住o係身，大家知唔知呢個咁靚o既Charmmy Kitty係乜傢伙？
登登登登.....就係非常之靚o既i pod套一個！o係我袋入面有好多貓形物品，但從來都唔會放上身，驚俾人笑吖o麻！

現身

2007-05-25T05:12:00.000+08:00

呢份工都幾多o野攞，雖然大部份我都唔o岩用，不過送俾人都好吖。今日就扲o左呢舊香薰Candle，聽聞都好似幾貴，唔該o個位阿姐見圖就速速現身，一陣俾第二個扲o左就喊都無為！

無自由？

2007-05-24T04:54:00.000+08:00

每一次買我o既心頭好，同事們都會問我：你買咁多o野阿某人唔鬧你o架咩？佢會點講o架？你收埋o係邊，乜乜物物又呢又路（因為佢地識煩人先生俾我更早），基本上一星期問足7日，每次我都係同一個答案>>唔洗收埋，亦唔會鬧。
唔明白點解唔俾買o野，更唔明白點解要鬧，從同事口中發覺俾人鬧好似係理所當然，唔知我變態定佢地變態，如果一個人連自由都無，同活死人有咩分別？唔洗問人攞錢，又唔會騷擾人，只不過係一個嗜好，原來咁都唔得？奇怪奇怪！
工作太辛苦，精神太勞累，如果連呢個寄托都無埋，我必定要去青山長住，因為會精神病。
是日新貨：

倒模？

2007-05-22T04:22:00.000+08:00

我最鍾意試新o野，無論洗頭水、護膚品、零食、糧餉通通都鍾意試，貓用品當然唔例外，吉蒂姐同炳哥迫住要做白老鼠一二號，擔當起測試員呢個神聖o既重任。
最近佢地就試用Cat Country貓沙，結果非常之驚人。呢隻貓沙竟然同Tidy Cat一模一樣，無錯係100%一樣，無論顔色、粗幼、氣味、結力通通都係一樣，好驚仲恐怖過孖生兄弟。

當飯食

2007-05-21T04:18:00.000+08:00

近排天氣差，又熱又焗又悶，無乜心情食飯！途經銅鑼灣印尼餐廳，門口櫥窗放滿大堆甜品，買幾舊返屋企試試，OH~~都幾好味o架。食兩舊飽晒，飯都唔洗食，唔錯唔錯！

乾塘

2007-05-20T04:07:00.000+08:00

本人絕對唔係文人，但都叫做要寫o下字搵食，o係工作上o既文篇係非常之詩情畫意o既，同呢個Blog完全唔同，所以大家唔洗擔心我會教壞細路。不過，寫得太多都總有乾塘o既時候，除o左銀包乾個腦都好乾，某日就拿拿聲買o左兩本書頂住檔，以備平日急救之用，頂得一時得一時o麻！

吉蒂迷

2007-05-19T21:36:00.001+08:00

其實我鐘意Charmmy Kitty多過Hello Kitty，不過Hello吉蒂係Charmmy吉蒂個主人，俾下面都會買佢d o野！
有日放工途經一個地方，見到好多Hello Kitty都幾令，買o左少少返屋企！

吉蒂垃圾桶都幾大個，一個我一個俾龐小姐放玩具。
好靚o既廁紙盒一個。
我個床頭，有時訓訓o下，o個兩個衰o野會跳上去開片，唔洗講都知d公仔必定澎澎聲咁跌落我個頭。

Keep Fat

2007-05-18T21:48:00.000+08:00

炳哥：肥肥地先可愛啊，我會努力KEEP FAT!!

散財

2007-05-15T21:44:00.000+08:00

我個新老細都係個愛喵之人，o個日送o左幾包Sheba餅餅俾佢兩小喵，唔洗講一定超鐘意！所以，o個日奉老細之命早d收工幫佢去買餅餅，真係好出事，UNY裝修o左之後都幾好行，我破財了！

蛋蛋

2007-05-14T21:19:00.000+08:00

最近沉迷扭蛋，每日唔扭兩隻都唔安樂，慘過以前扭Yes Card，呢款Hello Kitty真係好鬼令，我必定要盡快儲齊扭晒佢！

母親節快樂

2007-05-12T20:55:00.000+08:00

母親節去o左我阿姨屋企同成大班母親慶祝，又遲到又要打的，之不過反正都係坐的的，咁就落銅鑼灣買埋蛋糕同甜品先過去，因為坐的的過美孚係非常貴，當然要買多D o野先抵！

手癢癢

2007-05-04T20:47:00.000+08:00

好唔掂，真係好唔掂！返返o下工覺得好辛苦，又想屎又頂唔順，所以不顧一切放低手頭上工作，行去公司隔離個商場遊蕩，蕩o左幾樣o野返o黎。好靚o既Marie圍裙、儲開o既File、同埋超大o既Marie手扲鏡！正！

蛋糕班

2007-05-02T20:33:00.000+08:00

成日都想學整蛋糕，不過我D低能o既返工時間，攪到我無晒朋友，預早約定必定死梗，玩即興阿水理我咩！
某日原本有Booking，突然間又被人Cancel，嬲嬲地上網即時打電話去學整蛋糕，又咁好彩俾我搵到，拿拿聲殺出去上堂！嘻∼嘻∼就係咁第一個蛋糕終於面世，呵！睇落都唔錯o架！Connie姐姐我地幾時去學呀？？嘻！

受死

2007-05-01T22:13:00.000+08:00

過埋今日5.1勞動節假期，聽日又要返工，講真.....真係好想死。永遠做極唔完o既工作，永遠唔可以完成o既任務，真係3年又3年3年又3年，無間地獄。

明明

2007-04-30T17:58:00.000+08:00

平日放假我都無特別o野做，一係帶埋公司o野返屋企再作戰，一係已經倦到死o左，準備返屋企收皮。今晚扲著兩張飛同煩人先生睇o下戲，消磨時間又娛樂一番。我估呢齣戲應該有兩個極端反應，一係好鐘意一係好唔鐘意，無中間。我屬於好鐘意o個類，一來已經鐘意o左Susie Au好耐，二來的確拍得好靚，起碼唔係睇頭15分鐘已經知道結局o個種！

敏感

2007-04-29T18:12:00.000+08:00

自從轉o左新工之後，塊面一直未好過。基本上我係唔會生暗瘡，只不過長期Keep住敏感性爛面都夠我死，直頭足而致命。
試o左KIEHL'S補濕、敏感ROSEWATER幾日，效果好得驚人，敏感情況已經攪掂7788，救星到。我必定會買齊成Set返屋企慢慢試到夠。
好多好多花瓣，成份無添加，塗上面即時舒緩敏感皮膚，正x100！
同埋轉用CRABTREE SPF-15 day cream，有一大堆植物精華，塗上面好快吸收唔會油林林，一樣咁正！

泰．好味

2007-04-28T18:37:00.000+08:00

我個好靚o既阿姨o個日好得閒咁約我去Shopping同食飯，之後佢帶o左我去登龍街食泰國o野，嘩.....呢間泰菜館的確係平、靚、正，兩個人勁食勁食埋單2百幾，好抵啊！非常回味o既咖哩蟹同埋炒硯，依家流口水中。

龐小姐的禮物

2007-04-27T18:43:00.000+08:00

我經常買禮物送俾阿BB龐小姐，包羅萬有見有咩o岩都會送俾佢，話晒BB女用品靚好多，BB仔D款硬係肉酸D！
龐小姐好多頭髮，夾仔o岩晒佢，雖然佢已經有好多好多夾夾，10個頭都夾唔晒，不過話晒龐小姐每日都會落街散步，出o黎行走江湖當然要天天新款啦，嘻∼嘻∼
超得意又好靚o既口水肩，同埋Marie毛巾仔，唔知龐小姐會唔會話我攪到佢鬼五馬六呢？
BABY KITTY 嬰兒牙刷，雖然未出牙仔但係都可以刷牙。隔離o個支CHARMMY KITTY係我o架，之不過我用開電動，呢支只係用o黎儲呢！值得一提，呢兩支都係MADE IN JAPAN，不過一d都唔貴。
嘻∼嘻∼細路女出街係麻煩d，夏天到必定要長備毛巾仔，抺身抺手抺汗抺乜都得。

傻小兔

2007-04-26T19:04:00.000+08:00

係人都知我屋企仲有一隻大白兔，不過甚少o係呢到蒲頭。阿小兔個廁所經已俾佢咬到又花又爛，同埋佢最愛o既小食亦經已食清，所以就去買番個粉紅色o既新廁所同埋一堆小食俾佢，我諗小兔應該會鐘意掛！

i-pod nano

2007-04-25T19:16:00.000+08:00

做o野越辛苦壓力越大，買o野就越買越狠，有時扲到返屋企就放埋一邊，我諗我係鐘意買o野o既過程多過想擁有o個件東東！心血來潮想買部i-pod nano，即刻走入豐澤同店員講想要呢部，碌card俾錢即走，全程唔過5分鐘！一如所料，部機我完全未用。

么鳳

2007-04-24T19:22:00.000+08:00

即係咁，由於本人長期Keep住減肥狀態，可以食o野o既quota已經唔多，所以有得揀都盡量揀質數高o既去食，起碼為美食而肥總好過唔知為乜肥。
呢間么鳳就係我經常幫襯o既零食店，係人都知佢o既食物貴，仲係一兩兩計唔係一包包買，不過佢o既食物真係好好食，好食到不得了。我平均個幾星期幫襯一次，每次放低百幾個大洋，數量唔多但回味無窮，真係好正o架！記住係去富明街o個間呢，忍痛買第一次包你食上癮。

指甲

2007-04-23T19:52:00.000+08:00

雖然每日都需要體力勞動，不過我係超鐘意整手指甲，花o左咪再油過無咩所謂。有段時間好鐘意出去修甲，但下下都要呆坐幾個鐘，頂唔順自己修好過。
試過好多牌子指甲油，大牌子無走雞一定好用，不過我超級花心用幾次就唔用，百幾蚊一支確係好貴。而Skin Food價錢平之餘質數都唔差，佢o既落甲油紙更加無酒精成份，仲有好香o既橙味，今期推介。

朋友的手信

2007-04-22T21:59:00.000+08:00

朋友出門去旅行，都會問我有咩想要有咩想買，一向我都唔太鐘意指定要乜乜物物，因為人地去旅行開開心心，但係要為o左幫人買o野，點都會有一定壓力，所以我唔想朋友們心掛掛，玩都玩得唔安樂。不過，我就習慣俾舊錢朋友仔，叫佢地見到乜覺得我鐘意o既就幫我買，人地無壓力之餘我又有新o野玩，一舉多得。今次我o既朋友仔就幫我買o左呢d，唔洗講都知好o岩我心水，原來個個都知我係咁白痴o既！

送禮

2007-04-21T22:08:00.000+08:00

通常我自己試過好用o既o野會介紹俾身邊人，通常人地唔理我我會買埋迫人用，CRABTREE呢條新Line好好用，適逢我個阿姨呢排心情唔多靚，於是買o黎送俾佢.....佢都話正喎！

好抵買

2007-04-20T02:36:00.000+08:00

因為Crabtree新出草本系列，我個阿姨又俾o左幾張半價o既Coupon我，所以我就忍唔住入入貨。話說當日我路經Landmark Crabtree，不過太趕時間望兩望就走，一個鐘後再路經銅鑼灣Crabtree，有15分鐘空檔一於直衝。
因為呢間Shop做緊d好抵好抵o既優惠，買夠一定價錢就勁送乜乜物物，再加上我o既Coupon，原先呢到千幾蚊貨，我只係俾o左$545，抵到爛啊唔買走寶！

手信

2007-04-17T17:42:00.000+08:00

因為煩人先生周不時出Trip，所以我經常會叫佢買D得意貓o野返o黎送俾吉蒂、炳哥，不過次次佢都話掉晒屋企D再講，好明顯我係唔會掉，所以每一次貓地都無禮物。今次佢去澳洲，最失敗我唔記得叫佢買Jurlique，失敗中之失敗，只係叫佢是但買D o野俾我！

有紅酒兩支，其中一支已經俾我一個人一晚攪掂o左，我唔識飲紅酒，不過呢隻幾易入口，唔錯唔錯。

呢隻木鴨仔，我都唔知點介紹佢，總之佢就係一隻幾大隻又幾得意o既木鴨仔。

朱朱力一包，唔知好無食，因為我一粒都無食過已經俾煩人先生清袋，依家身在將軍澳堆田區。

生日快樂喎

2007-04-16T02:31:00.000+08:00

今日係煩人先生o既生日，不過佢身在墨爾本無人同佢慶祝。而o係香港嘆世界o既炳哥就好醒目，拉佢個反光餅落地大覺訓，叻到震！祝煩人先生身體健康、不勞而獲啦！

手信

2007-04-09T01:54:00.000+08:00

雖然馬交係個好近o既地方，不過都要是是但但買D野滿足o下自己，話晒出過門兩日一夜吖o麻！
１．葡國雞雞磁石一大對！
２．漁人碼頭毛毛豬音樂公仔，永利送俾龐小姐o既！
３．香港都有得買o既o野食！
４．唔知香港有無得買o既o野食！嘻∼嘻∼

馬交遊（二）

2007-04-08T00:49:00.000+08:00

第二朝起身Check Out後，無無聊聊四圍遊蕩，蕩o左去大三巴隔近，同樣無乜目標見乜食乜。不過，無意中見到一幅大黃貓貓牆，好掛住吉蒂、炳哥啊！

極多人排隊o既炭燒金錢餅，唔洗講我一定會排埋一份，親身試過真係幾好味，唔錯唔錯！

又係超多人o既餃子店，不設堂食只有外賣，又係好好味排o下隊都抵。

繼續遊...蕩去大三巴同議事亭，由於超多人只係影張相就∼∼即閃！

上年發覺大利豬豬包超難食，發誓唔會再去。今次，去o左金馬倫試試，豬豬包加朱朱力布丁加蛋撻，好味兼超肥！

由於超無聊超得閒超多時間，過o左去漁人碼頭玩，其實無咩玩只係影相影相同影相，影到呆悶到癲......一於入去巴比倫SeeSee......又有奇蹟出現，半個鐘輸$600...心血來潮買鋪圍.....嘩哈哈∼竟然竟然竟然竟然竟然會中，即閃啊！

過去（乙水）仔行，由於太飽無乜心情食飯，所以先食個木康布丁，再食魚刺麵，都唔錯幾好啦！
晚上11:45船，之不過兩條友攰到傻o左，10:30去到碼頭邊坐邊覺覺豬，上船再訓。再見喇馬交，等我呀呀呀呀呀！

馬交遊（一）

2007-04-07T04:39:00.000+08:00

自從轉o左新工之後，做到我瓜柴！雖然係放公眾假期，不過o係唔適當o既時候放假，慘過唔放大大鑊！好明顯呢5日假後，一定做到命不久已，所以決定過去馬交一趟，暫時離開香港呢個鬼地方！

朝早11:45船，一如以往我同煩人去旅行o既習慣∼遲到！上o左1200點船！過到馬交點零鐘，見咁早一於唔打的行去酒店，沿途見乜食乜！好奇怪，馬交一向俾我o既感覺都好極端，因為賭場關係佢好繁榮又五光十色，但係另一方面又好破舊，十足一個鬼城！
行行o下見到一間咖哩撈麵，即刻走入去勁食！食飽飽出門口，竟然見到鼎泰豐，又入去食食食！o個d蟹粉小籠包正過香港o個d多多聲，真係好多蟹粉！

原先想訂o既酒店間間Full，懷住失望o既心情行過去富豪酒店，心諗必定唔係好o野！不過，真係估唔到原來佢翻新完好新淨，有少少似Hip Hotel，Lobby白雪雪！酒店房非常Warm，我由細到大住咁多間酒店，唯一真係得呢間唔驚，感覺非常好！

由就前一晚只係訓o左兩個鐘，所以o係酒店訓醒先出動。兩條友打去法蘭度Book位，oh~~唔俾Book!要親身去等，等足兩個幾鐘，無聊下四圍影，嘻∼嘻∼大家唔係見鬼，只係兩個鬼妹仔！

兩個人...食雞食蟹食乳豬仔，都真係唔好食仲幾貴！呢個價錢去食橋底辣蟹正好多啦！以後都唔會再去！

o係門口見到隻4-5個月乳牛貓仔，超得意唔驚人。有對外國父母仲教個BB女摸貓仔，都話外國教法Open好多，比著香港o個d，一定同d細路講：貓會食人o架，快D走啦！

食飽飽坐巴士過新蒲京，一入門口已經想屎，頭痛加想嘔，可能係風水太強勁，即閃。過去永利感覺就Very good，同煩人坐低玩番陣，唔洗一個鐘兩個敗北收場，最後憑我個16點翻身兼贏凸，閃！再去星際參觀下，好大陸Feel，再閃！轉去金沙拉老虎機想贏幾十萬，最後玩o左一陣贏幾百蚊，快閃返酒店！當時已經差不多5:00!

酒店房望出去，馬交完全係一個夜生活o既地方，朝早真係唔適合佢！

暫別009

2007-04-07T02:44:00.000+08:00

幾個鐘頭後，我個手帕交009將會乘坐ANA航空公司，遠征東洋求學。話晒我識o左佢廿幾年，當然非常唔捨得，睇怕我都要儲定錢個個月交長途電話費。
見到呢位美女可以達成心願，非常登佢開心，而且佢長註東洋.....嘻.....嘻.....可以做我o既私人買手，嘩.....發達o羅.....諗起都興奮。當然，我唔會咁衰仔，要呢個貧苦學生過去捱窮讀書幫我勁掃貨啦，我會識做o既，當做幫補o下喇！
祝我o既好朋友009一路順風、生活愉快。7月我會去搵你o架！呵.....呵.....呵.....

小小心意

2007-04-06T22:07:00.000+08:00

因為好友009將要遠征東洋，所以作為豬朋狗友o既我就準備o左小小心意送俾呢個老友。因為009小姐有一副天使面孔，再加上一把超靚o既長頭髮，所以我送上一堆飾物，等佢可以同日日新款天天不同o既日本美少女鬥過，祝009小姐o係東洋生活愉快、事事如意啦！

狗餅

2007-04-05T22:23:00.000+08:00

小狗狗大佬好可憐，因為食物同皮膚敏感，攪到長期食素菜狗菜，零食更加唔洗諗。不過，幾個月前我買o左有機素菜餅餅小食俾佢試，結果無不良反應，自此我越o黎越大膽，只要無肉類成份都會買俾佢。今次我搜羅o左幾種新口味，睇落唔錯食落都應該OK架，有牛油味、香蕉味、蘆薈、雜菜、乳酸粒粒......大佬，我對你算係咁啦！嘻...嘻...

呢個姐姐真好人

2007-04-04T23:30:00.000+08:00

約o左Connie姐姐好耐，準備交換禮物，不過時間就唔o岩，一係我忙一係佢忙，早排惟有襯煩人先生返老家開餐，順道搵Connie姐姐。當煩人先生交收完畢，返到屋企即時望住我：你D朋友真係好，D貓又有o野玩，成大袋咁鬼重....唉.....成屋都係垃圾...做貓真係好...（下刪一千字）......。我扲上手，果然係好重。之前Connie姐姐重要千辛萬苦扲返公司等我個肥姨丈扲，個肥人又屎都唔扲，最後要再扲返屋企等我交收，真係過意唔去。除o左做苦力，呢位小姐仲放o左舊錢入袋，有多無少o個隻！咁我......惟有以身相許，又或者......請食Buffet啦！嘩...呵...呵！

Yarrah貓乾糧，有齊雞同魚味，當零食餵兩小貓，竟然爭食好好味喎！仲有10大包重到癲o既貓餅餅，不過唔記得影相。
嘩∼嘩∼4罐罐頭，其中一罐仲要o係瑪姬醫生到買，再扲返屋企，再轉送到我家，真係過意唔去喇！其餘，都係姐姐送俾炳哥食，多謝x100000000！
嘻∼英國手信。貓地吹波波，我就有貓形沖涼液，好滾動添！
仲有3個超重香港貓月曆，要Connie姐姐幫我扲返屋企，原來我都幾唔客氣o架喎！
唉.....仲要幫我買埋杜蟲藥添，我諗今次以身相許都唔掂！鳴.....鳴.....鳴.......................

攪攪震

2007-04-03T02:32:00.000+08:00

基本上，吉蒂姐同炳哥稱唔上係朋友，只可以叫做同屋主。一日都係個衰炳，又唔知自己幾噸重，成日扮大佬蝦蝦霸霸，攪到喵見喵憎。不過，間唔中都會見到佢地相隔幾個身位覺覺豬，但係.....真係好間唔中，10次都無，而且絕對唔會有身體接觸。可能係炳哥屎味纏身，行近D都會令吉蒂姐即時彈開，生人勿近。

三個月

2007-03-21T05:58:00.000+08:00

話咁快龐小姐3個月喇，不過睇個樣就唔似咁細個。次次龐小姐出巡去檢查，成班姑娘、醫生都係圍住佢，點都唔信只係3個月人仔，仲話佢生得成熟，細路扮大人，簡單D講.....即係老人精啦！