kitty-bingbing

我叫李吉蒂,英文名係Kitty Li。個個都叫我亞吉、吉貓、吉仔、傻吉....大家都可以咁叫我o架! 我最鐘意訓覺同玩,最憎當然係肥炳啦,佢個白痴炳仲每日都追殺我.....我...梗係...匿埋啦! 唔通同佢打過咩...........

12.29.2006

送俾自己嘅禮物

近來私事公事上非常多突發事件要處理,而且鑊鑊新鮮鑊鑊甘,非常煩惱好大壓力!所以,就要搵D嘢調劑吓,一係食一係買,咁當然揀後者啦,仲搏命食真係有排減,千祈唔好自己玩自己!其實我都幾識自己尋開心㗎,買完嘢真係一身鬆晒第日再煩過!嘻......嘻........就當送俾自己嘅聖誕、新年禮物啦!

1.有史以來第一次自己出錢買相機,呢部F31係非常之正,可惜我仲未真真正正咁試玩過,只係求求其其影幾張,不過唔洗閃光燈室內暗到爆都影到吉蒂同肥哥喎,好嘢呀!但係我而家一直用舊機,呢部放埋咗。俾D時間我,我一定試影俾大家睇啦!kaka........

2.呵....呵....呢個厲害呀,我只係lunch hour無意中見到,絕對唔係有心行街去搵!一見即刻唔放過,呢個Marie箱好大個,入面仲送好多好多禮物㗎,好開心呀!Yeah~~~~

3.除咗Marie之外,另一至愛就係Charmmy Kitty,呢張係我見過最舒服最靚嘅卡通毛毯,佢質地係珍珠棉,好滑好輕仲有個Charmmy袋入住,點可以唔買呢!一張我一張俾BB女㗎!

4.大大個頭Charmmy Kitty薄仔一本,無咩用只係儲吓囉!

5.Marie浴帽、間尺、File、杯墊,我好鍾意!越睇越似吉蒂貓!hohoho......

6.Mouse Pad買返公司嘅,做嘢開心D又快手D,個人又輕鬆D,的確唔錯!

7.都係儲物之一,無乜特別!

8.上次俾我發現新大陸,搵到幾間9成賣Made in Japan吉蒂嘢,仲款多又特別,心思思去咗幾轉,最鍾意係黑色包Kitty面油紙,好靚㗎!
9.銀包係我嘅,其他都係BB女,同樣喺新大陸到買呢!嘻.....嘻......
10.3個File都係唔會用,我最鍾意當然係紫色好似Anna Sui嗰款啦,Last one咁都俾我買到!
11.一見到就雙眼發光,要諗諗點用呢!

Labels:

12.26.2006

Boxing Day~拆禮物

今年收鑊唔算豐富呀,我D阿姨又唔買俾我,好明顯係我送番俾佢地添啦,唔緊要.....新年扲番佢地幾十封利是補數!呵......呵....呵...........

呢份係煩人先生送俾我,恨咗好耐嘅化妝掃Set,咁貴我當然唔捨得買俾自己啦,有人送心情輕鬆好多!嘻...嘻....多謝晒!


呢份呢就係合作開嘅PR姐姐送俾我,收到好開心呢!一來我好鍾意呢個牌子,二來返到公司就見到喺桌面,好滾動呀!kakakaka..........


Marie垃圾桶就係白老鼠同僚送嘅,佢知我鍾意Marie貓,見靚就買囉!多謝噢.......


呢本喵喵薄就係另一位同僚送俾我,其實仲有一棵Melody聖誕樹㗎,不過放咗喺公司無影相,多謝呢位同僚好好人呢!


呢D就係ROSA姐姐送俾吉蒂同炳哥嘅小食,佢地好鍾意炳哥食到LamLam脷,多謝晒ROSA姐姐噢!

Labels:

12.25.2006

聖誕快樂呀

呵....呵....呵....呵....呵....呵....呵....聖誕快樂呀各位朋友仔!大家都見到我屋企有放聖誕樹呢!
話說有人我同煩人先生講:唔....有貓之後都無得放聖誕樹..無氣氛Lu!
第日放工...登..登..登..登.......我就見到聖誕大樹一棵!好奇怪,炳哥開頭係狂咬,
我一度想收埋棵樹算數,之不過由煩人先生出馬同小炳講掂數..之後...聖誕樹安全過渡!神奇神奇..........

Labels:

12.20.2006

聖誕送禮

嘩..嘩...今年聖誕準備咗好多聖誕禮物,不過本人無雙糧、無花紅、無加人工亦無發達,只係想大家都開開心心呢!
小童組:查實我自己最鍾意呢個組別啦,D禮物係我最鍾意嘅,見到都好開心!希望D姐姐仔收到都開心啦!嘻....嘻.....
婦女組:話明婦女當然係經常入廚房,最實用就係廚房用品,花花圍裙同手套好難買㗎,用咗心情好D,煮飯都好味D!
貪靚組:呢個牌子我自己都好鍾意㗎,又香又滑超好用,抵我買到破晒產送俾大家,希望收到嘅人都會鍾意啦!

Labels:

12.14.2006

自製茶包

話說我好鍾意飲茶喎,平時都係茶當水飲。之不過,茶包無咁靚飲兩飲就無味,茶葉當然好好多啦,但事後清潔無敵煩。
無意中見到呢個茶包袋仔,將D茶葉放入去就乾手淨腳,非常之咁方便嘅!呢個茶葉袋,係我2006年買得最成功嘅一樣嘢,真係好好用呢,最抵死係Made in Japan呢,用咗應該唔會出事掛!

Labels:

12.08.2006

吉蒂姐姐保你大

之前提過,吉蒂小姐食物敏感耳仔烏槽過屎坑,洗耳之由RC SC31轉同牌子DR25,點不知食咗兩包耳仔再烏槽,又試HILL'S Z/D,已經係最後一隻處方抗敏糧,之不過耳仔好咗DD,但係痾爛屎囉!
咁樣......咪又再食番DR25,再滴10日耳藥水,依家滴完喇.....唔.....又唔可以講100% recover,係好咗8-9成,要觀察吓先!吉蒂姐姐....我保你大唔好玩嘢啦!近排我好忙,未有時間出絕招呀,你唔好再敏感喇!拜扥拜扥..........

Labels:

12.06.2006

好用喎

我個白老鼠同僚介紹我買咗隻Mask喎,唔錯唔錯的確好用!
係希臘牌子叫APIVITA,佢個深層清潔、青瓜、胡蘿白都超好用,
唔刺激、唔敏感仲好乾淨,有興趣去呢到睇睇>http://www.apivita.com/

Labels:

12.03.2006

北上


一時興起,同阿煩人先生北上。之不過,上到去都天黑lu,無咩特別嘢做過,只係去買書同打邊爐!

就喺書城下面間藝術用品中心....攪錯呀..咁都俾我見到Marie..要買先!!仲有一本波波薄啦,因為我一直都係用薄仔抄電話,幾個月就用爛一本,成日都要換㗎!





然後,當然係去睇書啦,今次收穫豐富啊,買咗好多本喵喵書呢!




最騎呢係...本人一開始非常智障地去咗家禽嗰欄到睇,仲睇咗好耐....見到全部都係雞牛羊仲死搵爛搵..hehe..後尾先識行番去寵物 嗰欄呢!今次d書好掂啊..消閒少實用醫學多,有排我睇呀!

之後,咪去咗小肥羊狂食囉,真係狂食啊。Order時待應哥哥已經好多樣唔俾我地叫,話兩個人食唔晒呀,最後揀咗8樣材料....正喎..埋單$160蚊飽到屎,好味過香港小肥羊添!

Labels:

12.02.2006

意料之外

小吉蒂因為食物敏感,攪到耳仔好烏槽,一路食開嘅處方RC SC31要退役喇,再試RC HYPOALLERGENIC開頭都ok啦,食多一陣唔太掂喇,耳仔再烏槽,要試Hill's Z/D....不過呢隻糧上年食過,皮膚靚啊肚痾之o麻......唔理咁多再試吓先!
所以,我就去醫生到買糧同埋扲耳仔藥水啦,平時我都係坐巴士過半山,唔知點解今次我竟然會唔小心遲落一個站,正當好愁之際..俾我見到間Petshop..又俾我見到d CIAO罐罐好鬼平,仲要係有極多味道......um...好明顯去咗掃貨啦!
跟手去醫生到扲糧、耳藥水,然後就行落山準備坐巴士返工,突然睇...俾我見到我未見過嘅日版Pocky...唔得了...唔買會後悔!
就係咁,唔洗一個鐘已經散我好多財,中環有無咁多嘢買啊????

Labels: