閃閃貓棒勁好玩

$10兩大支比人玩o既玩具，買番o黎插入舊貓棒，玩爛就掉唔肉赤！如果唔怕比貓左右夾攻，就咁玩都得！

呢粒騎呢星星個樣好騎呢，同炳哥有100%似，又忍唔住手買o左！我發誓呢個月都唔會再買o野！

因為小炳o既鋼山神功已經去到10級o既達人境界，玩具玩幾下就要扲去將軍澳堆田，今日比我o係$10店見到比人玩o既閃閃棒，$10兩大支拿拿聲買！剪o左其中一邊插入舊貓棒...非常好玩，查實就咁原支玩亦可，不過本人抵受唔住炳哥左右手摩打狂爪，都係改裝o下好D！！

掃貨

炳哥：又話有新禮物、新玩具、新罐頭、新零食、新車、新樓......究竟幾時有？

近排為貓地出完一輪血...今日o岩o岩任務完成..突然“叮”一聲..好耐都無買o野比自己喇！拿拿林買支想o左好耐o既香水先......

今日成功同兩個貓奴大手入貨，仲買到人地斷貨，之後上去網站click一click，見人地出o左This item is currently not available....竟然會變態地開心..真變態！呢批西洋o野，好快就坐飛機唔知經唔經北極o黎香港。我自己另一批東洋貨，已經o係今日上o左船仔o黎香港！
呢排出血多人都精神o左，可能係加速血液循環，收到張月結單心跳又快多幾廿下，血氣好o左可能淋巴都會快D好！

自由行

襯住仲有半條人命，煩人先生當日又得閒，所以就上o左去深圳遊蕩，雖然唔知有咩做，不過叫做四圍行o下，好過o係香港D電話不停響！


首先蕩o左去可口可樂專門店，呢間o野巴閉o羅，除o左美國同日本就只有呢間！之後想食雪糕，不過無我鐘意o既味，都係返香港先食lu.....反正一樣咁貴！

然後就去o左一間叫大灰狼o既餐廳開餐，裝修好特別野食都好味！查實我地叫o左好多o野食，仲有我至愛o既拔絲香蕉.....不過我唔記得影相！嘻∼嘻∼

買o左可口Tee一件仲送無敵大o既可口樽，仲有我次次必買大陸獨有o既吉百利黑朱朱力同朱朱力百力滋，最驚喜就係o係陸版Citysuper，Ole到見到零零狗專程由日本買比貓地o既濕糧，只係$4.x一包，不過寶礦力都係賣$3 o既同時，呢隻糧都算貴！

新御廁

呢舊就係吉蒂小姐同肥炳先生o既新御廁SN-620，因為Petshop膠袋唔夠大，就用垃圾袋包俾我，好過坦蕩蕩啦！之不過，當日我係扲住呢舊黑色o野，千里迢迢碌返工。無錯∼∼貓奴即係貓奴！

本來同班貓友仔一齊團購呢個廁所，不過又無貨！之後一直懶懶閒，無乜點理過！有晚，同比媽傾開話呢個廁所好難搵，但係我經常都見到，話晒我都係獅子座，挑起條癮一於第二日去買。去到Petshop見到有同款一大一細，Sales哥哥話我知呢個係Jumbo Size II乜乜乜，唔係我一向想要o既SN-620，心大心細就買個大啦！出到門口仲好開心打俾比媽，叫佢去買個SN-620，點不知瀨晒o野....原來本人呢個就係SN-620，我經常見到o個個只係細Size呢一個Model。奇就奇在，何解我之前團購連自己買緊咩都唔知呢？今次真係傻人有傻福！
比媽你唔好傷心，呢D display o野唔o岩你o架，讓俾我啦！嘻∼嘻∼嘻∼嘻∼

美食展

貓展無o野買，唯有去美食展博殺，睇相都知我收獲非常好啦！特別推介芒果綿花糖，正Wor!!

零零狗小姐都係勁食之士，所以上年同今年我地都孖住上掃貨！之後，呢位小姐話想打邊爐，我得番半條命都捨命陪君子！不過我要強調，呢位零零狗小姐絕對係靚女一名，我驚俾佢殺死先加粒星星，大家無樣睇！

OH∼∼美食展呢家o野，我同好友零零狗小姐都一定捧場，今年我地聰明o左用1000個理由早走之後殺過去，如果星期日去一定迫到人乾！雖然我都買o左唔少o野，不過仲有好多o野想買，但得一對手∼算把啦！
事後，我呢個淋巴發脹o既人都陪零零狗小姐去打邊爐，做朋友都算係咁啦！埋單時，零零狗小姐仲話請我補祝生日.....嘩.....呢個大恩大德...真係沒齒難忘，話晒我都唔係好食得o野！多謝晒零零狗小姐........

發冷

除o左一張好亂o既床，你地仲見到d乜？？咪就係有鋪鑽被癮o既炳哥o羅.......

夏天鐘意鑽被o既炳哥，大熱天時照樣訓被竇，佢呢招《獨貓鑽》唔知o係邊到學返o黎！

炳哥為貓特別騎呢，人做佢唔做，係要做d古怪行為！大熱天時，最鐘意襯我關冷氣，即刻鑽落被竇，無錯........係鑽落去！用頭頂開張被，再攝入去，熱辣辣訓成個下晝！冬天.......倒轉訓地下o羅......騎呢！

珍藏BB炳

小吉蒂細時多病痛，小炳唯有放去阿e到湊住先！雖然我miss o左最得意o既BB炳年代，但o係我電話入面一直有批BB炳玉照從未公開！今日我發神經鼓起最大o既勇氣，試o下將過百張相落腦，好彩都唔難攪！因為珍藏o既關係，所以要吸番個Kitty-bingbing印仔先！

上圖：唔知點解，炳哥細個仲會大隻過依家，相中貓大約4-5個月，白色大舊仔當時歲幾o架喇！

下圖：佢細時好善良，可以俾大舊仔坐住都無問題，當時只係6個月，已經大大隻，反而依家就縮晒水？





炳哥同佢兩個妹，係我地一胎三隻帶返屋企！佢地非常老友，當時我都有諗過唔好拆散佢地串燒三兄妹，到最後我都係接番炳哥走！奇就奇在，兩個妹竟然無掛住佢，仲極度高興......可能私底下佢地一D都唔老友！

上圖：又一次証明，所有生物BB時期一定係Cutie，睇串燒三兄妹個樣就知！（小強除外）左起：甜甜、肥炳、牛奶妹

下圖：炳哥細時明明係藍色，家陣進化o左變做紅毛泥色........即係灰色！







串燒三兄妹由細到大都有個特徵，逢係有o野睇唔明、諗唔通，必定向左側頭扮海獅。呢個習慣一直Keep到依家都無變，失散都會認得！

上圖：頭擰擰、扮可愛，查實唔知望緊乜？

下圖：串燒三兄妹會互相Lam毛，不過炳哥同Kitty貓從來都無試過，一行埋即開拖........即係佢地唔老友o羅！

毛毛狗＠怪獸公司

公司曾經出現過好多珍禽異獸，有貓仔、狗仔、哈母太郎仔，呢隻毛毛狗見過幾次！呢個咁乾淨o既位，就係我專用位之一，乜都無只有垃圾！

毛毛狗每次出現都係香噴噴，仲有LV頸帶，拍得住富貴Cash!好想老笠佢返屋企，連埋頸帶！！呵...呵...

當時我係咁叫人抱住佢比我影相，因為放低佢會跳落地！即時有人大叫：狗仔驚高，唔會跳落地o架.....！係wor...唔記得o左添...嘻...嘻....

怪獸公司除o左多怪獸之外，亦有好多珍禽異獸。有一對大肥喵、細細粒松鼠狗、爆炸裝毛毛狗、似條蟲o既哈母太郎！間唔中就有一、兩隻o係你身邊閃過，無論你識唔識個主人，只要你抱起個小朋友，主人就會好開心咁話：阿xx，你乖乖地同姐姐玩喇，我一陣返o黎接你！未講完好快就飄開o左........我.....咪可以不停抽水o羅！

肥騰騰芒果糯米波

糯米粉、芒果、芒果汁、芒果粉漿、椰絲、牛油......肥到喊o既材料準備整芒果糯米波！

Nekodream有新食譜，唔洗一個鐘，我終於成功喇！登∼登∼登∼登∼肥騰騰芒果糯米波！

上次整o個時超難包，今日見到Nekodream有新食譜，原來包o個時要落牛油，咁先會唔黐手！今日精神好D，上次又整落好多材料，一於再試多次啦.......好快∼∼唔洗一個鐘，我終於成功喇，佢叫做肥騰騰芒果糯米波！！我要減肥，食o左一個，其他煩人掃晒o羅！呵...呵.....

加料

左面係Kitty貓、右面係豬炳，因為小吉蒂唔鐘意食蝦，所以只係加料比個炳哥！

炳仔：好好味...等我拿拿聲食多D先，一陣食埋白貓o個份！Kitty貓：彈開啦你∼∼肥豬頭！

我都唔知點解會加料比肥炳，可能呢排我自己無啖好食掛∼∼話時話，佢雖然叫豬炳，不過一D都唔豬！
話說，佢個衰仔最興食完自己o個兜就走去攪吉蒂，不過比我鬧得多，依家好乖仔呀，會坐o係側面等吉蒂姐姐食飽，佢先行去執手尾，唔會好似開頭咁樣∼∼夾硬迫人走！

無賴炳

雖然今日係我自己生日，話就話無咩特別.....一樣工作工作再工作....半夜先返到屋企！
但查實我又覺得好特別，一來百病纏身過生日，塊面同一個豬頭無分別！二來係中國o既鬼節，夜麻麻好得人驚o架o麻！
不過都要祝我自己.....身體健康身體健康同埋身體健康！
祝所有朋友同貓地都.....身體健康身體健康同埋身體健康！

我就無生日禮物喇，不過我送比小吉蒂o既生日禮物呢.....咪比個屎忽炳整到爛o羅！
呢個o靚仔.......正奀皮鬼！

失望....貓展

好辛苦先買到$200幾蚊o野.....同上年o既戰利品簡直差天共地....好失望呀！

今天拖住半條人命去貓展，諗住死都要買o野比佢地啦，點不知......我唔係買o野出血而死，而係比人迫死！入門口已經要排隊，打晒蛇餅....入到去更慘...慘過維園年宵！
我發覺今年好多路人甲乙丙...無養貓又去o左睇貓加上極無禮貌！可憐貓地變o左海洋公園班海獅、海豹.....慘！
有個自由神阿叔用堆垃圾紙霸一行位，話晒我阿姨都叫做大肚，問個阿叔借個位坐一陣等我去廁所，點不知個大叔竟然話你咁都得呀？阿姨當然無理佢，照樣坐埋去......
不過我地都無怪個阿叔，可能佢真係當o左o個到係海洋公園等睇海洋劇場掛，霸個靚位等阿海獅同海豹表演o羅！
唯一後悔....身為香港人都無發揮好客精神，介紹阿叔去維園坐到佢飽！

生日快樂

食罐頭無咩新意，一於兩溝罐頭，應該會開心D啦！屎忽炳食完又攪人~~~~真係好屎忽鬼！

Kitty貓：明明我生日，做乜有怪獸o係我後面o架？Blueberry蛋糕...好似好好味Bor.....豬炳無得食！

Kitty貓：你地影個蛋膠定影我呀∼∼趕走個豬炳都唔幫我影張正正經經o既靚女相∼∼唔制呀∼∼話晒我都2歲大個女....

祝小Kitty生日快樂、身體健康、心想事成、肥肥白白、豐衣足食∼∼呵...呵.........