是日晚餐

好無聊..日日都要為今日食乜o野頭痛，話晒一星期7日每日兩餐茶餐廳都唔係辦法，好易食到黐線o架o麻！所以，今晚好唔知食乜o既情況底o下食o左d新o野！hehe.....
係我買但又唔記得幾時買o既叮叮通粉，原來........都幾好味o架！

唔食就過期o既Hot Cake，咁即係要食埋佢啦，諗o下點食先！

超大粒又好甜o既士多berry，一粒粒食有D悶喎..........

hehe......最尾整o左呢個出o黎，好好味o架！...........起碼唔洗餐餐粥粉麵飯先啦！good!!

餵大佬

有人話要去馬交反o下喎，咁我就去幫手餵大佬小狗狗o羅！下晝，買包新糧俾阿大佬試o下，鬼死咁重又要打的返工，拿拿臨做晒d野驚大佬肚餓，飛奔去佢屋企，去到已經係夜晚1230，不停執屎執尿大佬又跟手痾屎痾尿，之後等佢食飽玩飽就幫佢影相啦，佢好鬼靚仔o架！走o個時已經係３點幾，我由太子返炮台山再行條奪命長樓梯返屋企，真係隨時會死，所以.....唔好理又打的！（希望阿某人見到會識做呢！kakakakakaaaa.....）
真係要讚o下呢部F31 100次，呢d相我係o係極暗無閃燈打auto情況下亂影，加上呢位Model不停四圍跳，依然影到咁靚啊，呢部真係名乎其實o既傻瓜機，點影都靚全無技術可言！一個字∼掂！！

收大禮

我有兩個女同僚知道我鐘意Charmmy Kitty同Marie就成日送禮物俾我，真係好喇！（即係証明我對人都唔錯o架！）今日返工....又見到一盒Charmmy Kitty砌圖放o係我個位，唔洗問又係其中一位同僚啦！好靚好得意o架，開心屎我！

試機

買o左部F31直頭係我2006年最正確o既決定，雖然我未曾真係研究過佢，不過真係亂影都無問題，就算吉蒂小姐、肥炳先生不停四圍擰，暗到近乎無燈o既環境，一樣照影無問題！
以上小吉蒂就係示範一個黑到飛起、無Setting、無閃燈，隨手開著部機即影o既效果，真係好靚o架！開心X1000000000

好鄰居

小炳一向有床就訓、有屋就入；吉蒂貓最憎上床、極凍先入屋仔！早排開草莓屋俾大佬炳避寒，點知吉蒂即時飛奔入屋霸位，好明顯....打交收場！
依家，一人一間唔洗煩！不過，有個好得意o既奇境，佢地絕對唔到走入對方地盤，永遠都係訓自己o既物業，一步都唔會行入隔離屋做家訪。就算對方未歸位都唔會八卦入錯屋，明乎其實一對好鄰居，完全無交流！

吉蒂：白痴炳...我間屋靚過你草莓兜100倍，簡直係5星級的家！
炳仔：車...好巴閉咩..咪又係屋仔一間！
吉蒂：講咩啊你....出o黎打鑊你！
炳哥：再嘈...拆散你間屋啊！

掩眼法

小吉蒂絕對唔係想像中咁詩文，除o左怕炳仔之外....就天不怕地不怕！而且，比炳仔外向、大膽，每次有人出入必定9秒9衝出門口，鬧極都唔聽。

今日返到屋企都無咩問題，突然間我發覺.....唔見o左吉蒂貓，即時發癲狂搵，越搵越心急越搵唔到，方寸大亂又諗起好多無聊又無可能o既o野（例如：o係洗衣機、乾衣機、冷巷.....等等）起碼搵o左半個鐘，周屋走四圍摷！突然間，點解有d野望住我？？？阿姐，你好玩野喎，坐上去扮花樽傾頭偷笑望住我，嚇死我嘞！！

07展望

吉蒂貓：我梗係希望我同炳仔都身體健康、笑口常開、心想事成、想o個樣得o個樣、每日都有新玩具啦！各位朋友仔.....新年快樂啦！！

∼我希望我o個位貌美如花o既阿e日日笑唔停口，心想事成啦！
∼小B女身體健康、快高長大！唔洗聽教亦無需要聽話，最緊要開心！
∼小吉蒂同大佬佬敏感症全消，唔好再敏感敏感敏感敏感敏感！
∼身邊所有人貓狗都身體健康！
∼完成我學緊，又天一半地一半o既o野！
∼同connie小姐上整蛋糕班、動物傳意堂！
∼破解同煩人先生鬥唔講o野，佢次次贏我之謎！
∼唔好一發脾氣就爆粗，xyz都出齊！
∼減少每日發癲次數！
∼成功鑽研各種自然療法！
∼收到月結單永不言悔！
∼變態佬死晒，無人虐待動物！
∼身邊o既騎呢兼9唔搭8人士全部消失。
∼穩穩陣陣咪大上大落。
∼減少每星期打的次數，由7去1。
∼去得成旅行，最好係日本。
∼煩人先生多D開金口。
∼有限金錢買無限多o既o野！
∼心想事成成成成成！

補濕

呢排好Hit o既透明質酸補濕用品，我當然唔會放過啦，平時我買護膚品一定唔會手軟........因為.....屋企仲有一塊面幫我包底..自己唔用咪俾Mr.煩用o羅！hehe....話時話...呢兩隻透明質酸都好掂，強力補濕之餘亦無敏感，超正！
仲有SHISEIDO新line AQUALABEL，同樣係好好用，最勁係支導入精華，皮膚好快吸收，好正o架！
同事話呢隻牌子粉底好好用，咁我又試o下啦，不過...我到依家都仲未試，之後再report啦！另加好無聊又好靚o既Charmmy Kitty洗頭水一支，我估......應該係唔好用o既！

滿月

龐小姐滿月喇！我幫佢改o左英文名叫Charmmy，Charmmy Kitty o個個Charmmy，一來我阿e有5小喵佢係第6，所以都要改番個貓仔名啦，二來希望佢係靚女一名，hehe....真變態！
當日，只係開兩圍簡簡單單兩家人食o下飯，阿龐小姐就以一身迷人Pink Lady出場，好得意o架，好明顯全部人圍實佢啦！相入面，有個黑衫女子抱BB o既，就係我阿e即係龐小姐個阿媽，唔係我o黎o架！側面o個個o靚妹，係我第二個阿e個女，唔係佢個女，龐小姐係大小姐啊！

變態醫生等天收

大家千祈唔好去睇呢個變態醫生，不知所謂讀屎片。原來醫生唔係拯救生命，係要o黎導致生命永久殘癈！呢個屎片醫生，就係>>
http://www.hkcats.org/phpBB2/viewtopic.php?t=44211&start=0
曾經頂頂大名，有信譽有醫德o既Dr.tint，今日竟然會因為診所喵喵亂爪o野而幫佢除爪。用手術切斷喵喵手腳神經，爪依然存在不過完全無用途，簡單D講指甲變成裝飾，喵喵健全變傷殘！
白痴醫生，雖然你地西人只有天堂與地獄，之不過本人想話你知，中國說法有18層地獄，其中一樣酷刑就係勾斷手根腳根，今日你所做o既一切，必定他朝君體也相同，你真係一個好賤o既醫生！@$@#%$^%U&%^!@#!#@$#%$#^$%^&$%&^@#$!@#!#

滿月禮物

龐小姐21號滿月，咁我當然要準備禮物啦！查實由佢出世到依家，我都買o野買到流血不止，鬼叫BB女d用品靚到飛起咩，BB仔無咁多o野買o架！仲要搵日本製d質地先夠好呢！
龐小姐我祝你身體健康、快高長大喇！

特選晚餐

相比起吉蒂貓，炳哥真係好好口福，基本上....佢真係一個試食專員，但求放得入口通通都可以食，煩人先生曾經講過一個極無聊o既笑話，佢話如果炳仔係流浪貓一定會肥過依家，因為佢屎都照食，淨係垃圾都有排食...............一D都唔好笑！
如果我得閒佢又乖貓，我會整D新口味俾炳哥嘆o下，今次就有罐頭加雞柳再加野莓素，野莓素好酸所以只可以加少少，不過......傻仔炳當然會照食啦！

試糧篇20

1. 名稱： AIXIA白身金罐
2. 口味： 蟹柳、鮭魚
3. 價錢： 約$9
4. 質地： 呢隻質地唔錯，好明顯睇到一舊舊魚同蟹柳。
5. 歡喜指數： 唔洗問.......狂食！

試糧篇19

1. 名稱： 魚正
2. 口味： 金槍魚 鮭魚
3. 價錢： 120 Yen
4. 質地： 呢隻無咩特別，都係魚樣，普普通通啦！
5. 歡喜指數：咁都可以清兜，炳哥好o野！

試糧篇18

1. 名稱： CIAO
2. 口味： 貝柱、雞、白飯魚
3. 價錢： $9
4. 質地： 一貫CIAO作風，肉白又滑，仲香噴噴添！
5. 歡喜指數： 基本上我知衰炳一定鐘意，不過呢排樓上裝修，炳哥心事重重食淨1/3，其餘要我用手餵呢！

有機

查實本人o既外婆Jenny好鬼IN，o係有機風未吹到o既時候已經開始食有機食物！
收到通知糧倉清得7788，咁又係我出動o既時候啦！
原本想過Three Sixty一轉，不過.....我懶....近近地落天后算啦！
收鑊非常豐富，阿Sales姐姐仲送o左D有機清潔用品Sample俾我，都幾好用o架！

加料

吉蒂貓：咦....你地做咩呀？o下，打邊爐？沙爹湯底....好好味喎，有無我份o架？

吉蒂貓：不如咁啦...扲埋隻豬炳加料啦！佢肥騰騰...冬天好補o架，諗起都開心！

打邊爐

放o左工約煩人先生去銅鑼灣食飯，唔知食乜就去Sogo遊蕩，蕩多幾蕩煩人先生話買o野返屋企打邊爐！都好喎！
去Sogo超市...無o野買，再過Citysuper....慘慘慘...同樣無o野買，睇o下隻錶，呵...呵...9點幾梗係無o野買啦！
最後咪去24小時惠康，勁多o野買！原來惠康都OK o架，要乜有乜！返到屋企我好眼訓，死o左o係沙發，不出半個鐘煩人先生已經Set up好，12點開始打邊爐！
唔知係咪天氣凍，炳哥全程訓o係沙發反晒肚，Kitty貓.....唔....當然無咁豬兜...匿o係房到慢慢訓啦，D毛毛吸晒味好臭o架，邊有炳仔咁低B！！

咪攪啦........

呢個小B查實半個月人仔，不過......個樣超老積呢！

小B:ZZZ....ZZ..Z..Z..Z...ZZZZ....(暖苙苙訓場好覺！正呀)

媽咪：小B快D起身玩啦，咪掛住訓喇！有人o黎探你啊！
小B:咩料啊？？嘈住晒...仲影我相..你係邊位啊？

小B：一於扮聽唔到繼續發埋個靚夢先！（發夢ing...有玩具..奶奶...波板糖..KAKAKA...）

媽咪：都叫你快D起身呀...起身起身起身起身起身起身呀！

媽咪：仲訓..仲訓..仲訓..整醒你啊！
小B： WU..WUWU...WUWU...WU...攪乜o野啊？

小B:訓覺大過天..一於當聽唔到繼續訓..ZZZ...ZZZZZZZZ...

PS:呢輯相用F31影o架，室內環境極暗，無開閃光燈，小B唔耐煩四圍擰，結果顯示相效果非常之好，影BB影動物一流！亂影都得o岩晒我！

龐小B出o左世喇

呢位龐小姐o係12月21號出o左世喇，睇個樣好老積，查實只係半個月人仔。呢位龐小姐好古惑，要全家總動員為佢張羅，明玩o野！自己早成個月出世，唔做山羊座，揀做好動爛玩o既人馬座龐小B，你母親大人為o左你.........你咁醒目明我講乜o架啦！嘻...嘻.....你要識做呢！祝你身體健康、快高長大、快D返屋企同喵喵玩！

生完都咁靚o既，就係龐小姐o既母親大人，即係我阿e喇！祝你心想事成、笑口常開！努力o奧！

日本收鑊

嘻...嘻.....我個白老鼠同僚絕對係購物狂！
早幾日，佢就過o左日本一轉放血.....當然係出血成功...狂買狂買！
我扥白老鼠小姐見到靚o既Marie、Charmmy Kitty用品通通買返o黎，
無指定款式無指定價錢..因為佢眼光好好o架！
結果我無去到日本，都有呢4樣收鑊，埋單$2xx.....好靚好開心呢！

有排睇

唔知點解次次去到書店都忍唔到手，一定有好多好多書要買、想買！
呢D就係我今日o係書店o既收鑊，都好吖.....睇多D書講少D嘢，份人無咁燥底！o岩晒我！

二選一

都話我好鬼多心o架啦...見到貓貓記事薄..又忍唔住，結果...要二選一，只可以有一本日日貼身跟住我！

登登登登...左諗右諗，都係用Charmmy Kitty啦，一來夠薄二來夠靚，連內頁都靚過人，仲有Charmmy身世之謎介紹，hohoho.....用o左佢我相信成個2007年都會咁開心！