出院喇

呢粒黃豆，o係我入院o既時候一直插o係左手，用o黎落麻醉藥、吊鹽水。睇落唔係好大粒，不過條通管都幾粗幾長，差唔多有2吋長，長時間插o係手都幾辛苦。有少少郁動都覺得會破皮而出，好唔方便又唔舒服！












一早有心理準備會變四方面，但係無心理準備會鼻同嘴都又腫又變形，恐怖到自己都唔夠膽照鏡！塊巨面已經超越o左四方，變成不規則形狀，嘴又擘唔開，想點呢？





終於都出院喇，其實我應該係好好彩，因為我係全身麻醉，所以成個剝牙過程我都係訓著覺，醒番已經攪掂，原全唔似o係出面睇牙醫有生剝o既感覺，應該值得慶祝！不過，有辣有唔辣，因為全身麻醉要插喉，醒番鼻同喉嚨都有血絲，而喉嚨更加係重災區，痛到好似火燒爆炸咁痛，連埋剝牙傷口，即係成個口腔都又腫又痛！
醒番之後都未係太腫，醫生就同我講，因為d牙生得好深，磨開牙骨之後已經深到見到神經線，而剝牙過程有碰到神經線，所以塊面會有d痺，傷口係會特別腫特別痛！聽到之後，我已經有心理準備，點不知......一覺訓醒竟然變o左不規則方包超人，傷口、喉嚨、嘴唇、唔關事o既牙都痛到發癲....真係會發癲！要俾多d時間佢消腫、埋口............
感激醫院一班醫護人員，除o左細心亦對我非常之好，當我推入手術室時不停大叫好驚好驚，依然十分有耐性安慰我，入到手術室仲叫得大聲，醫生、護士、麻醉師都一面幫我插喉、麻醉貼心電圖比氧氣我聞一面o氹我，最記得我問o左一個好無聊o既問題：我會唔會做做o下醒o左？跟住聽到幾聲笑聲，醫生同我講眼訓就訓啦，我真係訓著o左，前後5秒都唔洗.........

告別智慧牙

放工即刻走去買番幾本書，成日流流長打發下時間啦！帶埋入院紙，就出發喇.......

終於都到呢一日，終於都收到入院紙，終於都如期進行！執完包袱、帶埋入院紙10:00am去到瑪麗見麻醉師，做o下body check驗o下血就行行企企，訓一晚28號朝早就入手術室同未見過面o既智慧牙講byebye!!
查實講就輕鬆實質上驚到發癲，阿智慧牙小姐，雖然我經常詛咒你，不過話晒我地都相處o左咁多年，你就乖乖地比醫生剝出o黎啦，唔好再攪事喇，唔該！！

又有禮物

因為阿老細要去日本，我就幫佢頂o野頂到傻！阿老細知我係貓奴，返到o黎香港就拿拿聲送份禮物∼∼日本貓書俾我，真係有我心！本書好好睇o架，又過癮又攪笑，多謝老細！

Kitty睇醫生喇

Kitty貓：做乜帶我睇醫生姐......我無事wor...耳仔烏糟D之o麻！

Kitty貓因為食物敏感攪到耳仔長期烏糟已經好耐喇，終於帶o左佢去見瑪姬醫生，醫生話除o左食物敏感原來仲有細菌，所以要滴藥水，佢細時食物敏感會肚痾，依家就變o左耳仔黑忟忟烏糟，不過瑪姬醫生話好多貓都會有咁o既情況，因為身體基能轉變，對食物o既反應都有唔同！唔知我入院o個時，煩人先生識唔識幫kitty小姐滴耳？？係一個謎...........

拒絕回應

Kitty貓：嘩....呵呵呵呵...炳仔你d衰o野揚晒出去，全香港都知喇，傻仔炳！
炳哥：呢d咁不盡不實o既報道，我係唔人回應o既。
Kitty貓：個內容係有地方錯，不過都話得你o岩呀，暴力炳！
炳哥：根本佢地就無訪問過我，只係無啦啦上o黎影我相，之後就話我有暴力傾向！
Kitty貓：算把啦，你都係接受現實啦，癲佬炳！
炳哥：呢d私人事我係唔會回應o既，暫時我都唔會接受傳媒o既訪問喇，唔該晒！多謝大家關心.........

中招喇

事前，姑娘已經千叮萬囑千祈唔可以病，一發燒、感冒就唔可以落醉藥，即係做唔到啦！點知有d喉嚨痛我已經知出事喇，起身o個時仲咳埋，嘩.....好驚呀，即時落去睇醫生，醫生拿拿林話幫我攪掂去，一陣唔可以如期開刀就大件事喇！
鬼叫自己成日諗住唔好病，越諗越緊張，越緊張越訓唔到，訓唔到就抵抗力低，抵抗力低咪病o羅，攞o黎衰！！

多謝姐姐

呢個貓草袋好好玩，kitty貓同小炳都非常鐘意，一個訓一個咬，搶住玩！

can姐姐好好人，成日都越洋送大禮比佢地兩個大帝，今次呢個貓草袋，係佢叫舊同事扲個比佢阿嫂再扲比佢媽咪再扲比我！仲話呢個係出口去英國，香港無得買o架！今日，約o左伯母扲袋同埋收吐毛膏錢....嘩...個袋好玩到不得了....kitty貓同小炳都唔理得咁多，爭住玩！多謝can姐姐！

事前準備

好想食壽司添，唔好理咁多拿拿林落銅鑼灣買，扲返屋企慢慢嘆！

之後，再去買齊我平日最鐘意食，但又唔敢食太多o既零食，返屋企開餐！

其實我入院前都無咩要準備，不過，我身邊好多有經驗人士都唔停咁講佢地o既慘痛經歷，仲叫我有咩鐘意食都拿拿聲食，如果唔係有排都食唔到！可能聽得太多o既關係，我真係10點幾走落銅鑼灣買我想食o既o野，買完之後先發覺，原來我鐘情o既美食都係肥爆！

安全到步

真係好快手！上月29號先寄出，今日已經o係我屋企啦！唔好睇少呢箱o野，大拿拿有成12kg，好重！

嘩......多謝靚姐姐幫忙我先可以成功入貨，品種唔多但數量搭夠，好開心呀！

話咁快就o黎到香港，左諗右諗今日唔扲就唔知幾時有時間扲，所以.......膽粗粗一個人去郵局扲呢箱廿幾磅o野，出事o既...有車仔都唔掂要即時打的，返到屋企......又出事喇...3:45pm遲晒大到....即刻衝落樓再打的....不過，為o左貓地大人....都要o架喇！
再次多謝o個位靚姐姐幫忙，真係好介紹呀！

大手入貨

台灣C小姐o既貓地一定要食呢個牌子o既膏膏，可惜台灣無o左個代理，D人竟然會炒膏膏，過百蚊支大把人搶，不過.....有我o係香港大量入貨寄比C小姐，咪唔洗挨貴膏o羅！

同兩個貓友特別好感情，台灣C小姐同埋香港C小姐，佢地都好好人，好多時輕輕講一聲佢地都會即刻出手，由其是買o野就更加快手。
同埋，佢地都非常大方，有好o野梗會預埋我貓地o個份，絕對唔會收收埋埋！佢地都有個共通點，就係做事爽快，性格爽直絕對唔會慢吞吞，講得出一定做得到！所以...台灣C小姐無晒吐毛膏，我當然會出手入貨，寄比佢o既小貓貓！！

又亂買.......

無乜特別鐘意一個公仔，只有特別憎一個公仔，所以見到靚又得意，通常都會買番去儲，charmmy kitty年曆買完幾日，sales姐姐話已經無貨喇，好彩買得快手！

clipper減價，又係我出動o既時候，買o左好靚又好平o既貓兜、玩具、書夾、原子筆.......買完o野心情好好多，病痛都少D.....hahhah.....

麻煩．智慧牙（II）

話咁快醫院就打o黎叫我今個禮拜.......入院即做....咁當然時間係就唔到啦！之後，我再冧o下阿姑娘....好o野，比o左27號個期我，27號入院見麻醉師，訓一晚第二朝做，再訓多一、兩晚.....收線後...又驚又開心！
點知無耐，阿姑娘又問22號入院得唔得，都係唔得啦...阿老細放大假我點走呀？之後，姑娘就話因為阿某某教授返o左o黎，所以帶埋好多症過去，驚我個手術室比人霸o左.......所以要睇我好無彩...好彩就如期唔好彩就再約.....天呀.....我27號要入院，25號先可以confirm堅定流，玩我咩！一睇我咁慘，就知我好無彩喇！

麻煩．智慧牙

隻智慧牙已經o係7月尾騷擾住我，痛到瓜柴唔在講，又唔可以即時剝得，攪o左一大論都係要轉介去醫院到剝，基本上呢d特徵我全部都有，大大話話都忍佢好耐！
終於排到期去菲臘牙科醫院比醫生睇下點攪。點知勁大雨，又唔識去惟有坐的士，好肉赤！
攪o左好耐，X-ray都照o左6張，終於見到醫生，醫生問我有無興趣參加佢地個研究，就係剝牙冠留番牙腳o係牙肉入面，話係試驗階段，個創傷無全隻剝咁大，之但係我以家個心靈創傷已經非常大，唔想再做試驗，容乜易牙腳o係牙肉入面發炎，再開刀我就...唔敢想像！
因為呢間醫院無得全身麻醉，所以就再轉介我去瑪麗醫院！不過，聽醫生再講清楚，基本上美其名就係剝得，實際上就係長江三峽爆破工程，首先要𠝹開牙肉、再劈開牙骨、打爆隻牙一塊塊夾出o黎，聽到都想喊！
見完醫生...4:15...我有貓貨要5:00前返到屋企樓下郵局扲，唔坐的士一定趕唔切，不過來回都打的，真係好肉赤....但唔扲又一個禮拜後先有時間扲！為o左唔想貓友仔失望，再忍痛打的！！終於趕得切去扲靚靚貓用品，好o野！

落咁大雨都係濕o左少少，抵讚∼∼∼我自己！嘻...嘻...嘻........

生日．炳

吉蒂貓：你2歲大個仔喇，咪再發神經啦....
炳哥：再講咬你o架.....

炳哥：你唔係買舊咁o既o野同我慶祝生日呀？

炳哥：好熱呀.....扲開佢啦.....

炳哥：係o羅.....呢d先o岩我....頭先o個d你自己食晒去啦！

祝炳哥、比比、牛牛、甜甜生日快樂、身體健康！！

生日前夕

清晨返到屋企先知比比媽送比炳哥o既生日禮物o係看更到，5點幾睡衣LOOK落去扲禮物∼∼夠騎呢！
原來禮物就係∼比比是也！多謝比爸、比媽同比比....祝比比以後都快樂、身體健康！

玩閃閃

貓奴必需品，相機加閃閃，引o下比爸AND比媽！

pizza....正呀

因為醫院已經寄o左信俾我，13號第一次見醫生，突然間好想食pizza，諗住都就快見醫生，屎就屎啦.....叫外賣pizza食！因為好多o野都想食，所以樣樣叫d，之不過煩人先生身在德國食腸仔，咁我又點會食得晒呢，所以每樣只係食o左少少，留番聽日再食啦！

手手

成日都想修下d手指甲，由其心力交碎時就最想整，整完.......成個精神晒！
今日做到癲o左之後，就搵地方修修佢，結果....整完之後好似差足電一樣，精神爽利！

5隻傻貓

因為我有新閃光燈，所以就出勤幫阿e的貓影相，多謝5小貓傾力演出，我先可以影到咁得意o既相！由其係牛奶妹小姐，全晚唔停四圍彈，叻女！